តាមរយៈសាររបស់សម្តេចប៉ាប បានស្នើឲ្យគ្រីស្តបរិស័ទ្ធនៅទូទាំងពិភពលោក យកថ្ងៃទី០២ ខែមីនា ជា ថ្ងៃបុណ្យរោយផេះ ដើម្បីរួមគ្នាអធិដ្ឋានដើម្បីសន្តិភាពសម្រាប់ប្រទេសអ៊ុយក្រែន។ ក្នុងនោះការិយាល័យយុវជន ជំទង់ និងកុមាតូច ក៏បានរៀបចំអធិដ្ឋានតេហ្សេ ដោយបានអញ្ជើញបងប្អូនគ្រីស្តបរិស័ទ្ធប្រមាណ៣០នាក់មកចូលរួមនៅព្រះវិហារសន្តប៉ូល និងសន្តសិលា ភ្នំពេញថ្មី។

លោក ស៊ាន់ សារឿន ជាអ្នកទទួលខុសត្រូវការិយាល័យយុវជន ជំទង់ និងកុមារ បានឱ្យដឹងថា ដោយសារតែក្នុងប្រទេសអ៊ុយក្រែននិងប្រទេសរុស្សី កំពុងតែមានសង្គ្រាម ជាពិសេសនៅប្រទេសអ៊ុយក្រែនមានប្រជាជនជាច្រើនដែល​ត្រូវជំលៀស ប្រជាជនជាច្រើនដែលបានបាត់បង់ផ្ទះសំបែង និងជាប្រទេសដែររងគ្រោះដោយសារការឆ្លានពានពីប្រទេសរុស្ស៉ី។

លោកបានបន្តថា ៖ «ការរៀបចំអធិដ្ឋានតេហ្សេនេះគឺដើម្បីឲ្យបញ្ឈប់សង្គ្រាម និងឲ្យអ្នកដឹកនាំរកវិធីសាស្រ្តដើម្បីផ្សៈផ្សារដោះស្រាយ ចរចារ តាមរយៈការសុំទូលអង្វររបស់យើងទៅព្រះជាម្ចាស់»។ លោក សាន់ សារឿន ឲ្យដឹងទៀតថា ៖ «យើងជាគ្រីស្តបរិស័ទ្ធដែលមានជំនឿលើព្រះជាម្ចាស់គឺយើងចង់បានសុខសន្តិភាព សេចក្តីសុខ សេរីភាពក្នុងការរស់នៅ ដូច្នេះអ្វីដែលប្រទេសរុស្ស៉ីកំពុងតែធ្វើទៅលើប្រទេសអ៊ុយក្រែនវាមិនស្របតាមព្រះសហឬទ័យនៃសេចក្តីស្រឡាញ់របស់ព្រះជាម្ចាស់»។

លោក សារឿន បានបញ្ជាក់ថា លោកសង្ឃឹមថានឹងមានសន្តិភាពនិងបញ្ឈប់សង្គ្រាមជាបន្ទាន់នៅប្រទេសអ៊ុយក្រែនតាមរយៈការអធិដ្ឋានថ្ងៃទី២ មីនានេះ។

លោក សាន់ សារឿន គ្រោងនឹងធ្វើការអធិដ្ឋានទូលសុំអង្វរព្រះជាម្ចាស់ ជារៀងរាល់សប្តាហ៍សម្រាប់សុខសន្តិភាពនៅប្រទេសអ៊ុយក្រែនដរាបណាសង្គ្រាមនៅតែមិនទាន់បញ្ចប់។ លោកថា ការអធិដ្ឋាននេះបញ្ជាក់ពីការចូលរួមចំណែ​ក រួបរួមគ្នាសុំសន្តិភាព និងបញ្ឈប់សង្គ្រាម ហើយបងប្អូនជាគ្រីស្តបរិស័ទក៏អាចធ្វើការអធិដ្ឋានផ្ទាល់ខ្លួនឬតាមព្រះសហគមន៍របស់ខ្លួនបានដែរ ដើម្បីឲ្យប្រជាជនអ៊ុយក្រែនបានវិលមកស្រុកកំណើត ដើម្បីបានប្រកបមុខរបររកស៊ីវិញ និងមានឯករាជ្យភាពឡើងវិញ។

អ្នកទទួលខុសត្រូវការិយាល័យយុវជន ជំទង់ និងកុមាររូបនេះ ក៏​បានផ្តាំផ្ញើទៅកាន់យុវជនយុវនារីនិងគ្រីស្តបរិស័ទទំាងអស់ថា ទោះបីសង្គ្រាមនេះមិនស្ថិតនៅក្នុងប្រទេសនេះក៏ដោយ តែលោកមានជំនឿថា សេចក្តីស្រឡាញ់របស់ព្រះជាម្ចាស់ ទុក្ខលំបាករបស់ប្រជាជនអ៊ុយក្រែន ទុក្ខលំបាករបស់ពិភពលោកក៏ដូចជាទុក្ខលំបាកនៅក្នុងព្រះសហគមន៍នៃប្រទេសកម្ពុជា គួរតែរួមរួមគ្នាដើម្បីអធិដ្ឋានដើម្បីទូលអង្វរដើម្បីស្វះស្វែងរកគ្រប់វិធីគ្រប់មធ្យោបាយ ទោះមិនអាចទៅជួបផ្ទាល់ឬផ្តល់ថវិការ ប៉ុន្តែកំលំាងខាងផ្លូវវិញ្ញាណ គឺជាការ​គាំទ្រមួយក៏ជាអ្វីមួយយ៉ាងសំខាន់។

លោក សារឿន បានបន្ថែមថា ៖ «ការអធិដ្ឋានបែបនេះបង្ហាញពីការរួបរួម ពីសាមគ្គីភាពដល់ប្រទេសអ៉ុយក្រែនដើម្បីឲ្យមានសន្តិភាពនិងដើម្បីឲ្យយុវជនរបស់យើងចាប់អារម្មណ៍អាចបង្កើតកម្មវិធីណាមួយបង្ហាញពីការចូលរួមតាមរយៈ​​ការអធិដ្ឋានផ្ទាល់ខ្លួន តាមរយៈការចែកចាយលើហ្វេសប៊ុក ដែលយើងគិតថាវាមានប្រយោជន៍និងបង្ហាញថាយើងចូលរួមចំណែក ដោយសេចក្តីស្រឡាញ់ ស្រឡាញ់សន្តិភាព យុត្តិធម៌ឡើងវិញ នៅក្នុងប្រទេសអ៉ុយក្រែន ជាពិសេសប្រ​ទេ​សរុស្ស៉ីដែរ ឲ្យមេដឹកនំាទំាងពីរវិលមករកតុចរចារ និងដកទ័ពចេញពីប្រទេសអ៊ុយក្រែន»៕