ថ្លែងនៅក្នុងពិធីបុណ្យឱឡារិកគោរពសន្តយ៉ូសែប ដែលជាឧបការីព្រះសហគមន៍នៅសែនសុខនៃព្រះវិហារសន្តយ៉ូសែប ក្នុងខណ្ឌសែនសុខ រាជធានីភ្នពេញ លោកអភិបាលព្រះសហគមន៍ភូមិភាគភ្នំពេញ អូលីវីយ៉េ ជ្មីតហស្លេ មានប្រសាសន៍ថា ថ្ងៃនេះព្រះសហគមន៍ឱ្យយើងគោរពសន្តយ៉ូសែប ដែលជាគំរូសម្រាប់យើងទាំងអស់គ្នា ដោយសន្តយ៉ូសែប ជាមនុស្សសុចរិត។ តាំងពីដើមរៀងមកបានដើរតាមព្រះជាម្ចាស់។
ពិធិបុណ្យគោរពនេះ បានធ្វើឡើងនៅរៀងរាល់ថ្ងៃទី១៩ មីនា ជារៀងរាល់ឆ្នាំ តាមប្រតិទិនរបស់ព្រះសហគមន៍កាតូលិកសកល។ លោកយ៉ូសែប គឺជាបិតារបស់ព្រះយេស៊ូ ត្រូវជាស្វាមីរបស់ព្រះនាងម៉ារី។ នៅលើរូបសំណាករបស់លោកយ៉ូសែប មានផ្កាលីលីពណ៌ស ជាតំណាង សុចរិតរបស់លោក។ លោកអភិបាលអូលីវីយ៉េ បញ្ជាក់ថា ភាពសុចរិតរបស់លោក គឺបានមកពីព្រះជាម្ចាស់ផ្ទាល់។ លោកបានឲ្យគ្រីស្តបរិស័ទដែលបានចូលរួមទាំងអស់ រិះគិតអំពីសុចរិតភាពរបស់ខ្លួន និងយកលោកយ៉ូសែបជាគំរូនៃជំនឿ។
លោកអភិបាលរំឭកថា ព្រះជាម្ចាស់មានគម្រោងការដោយបំភ្លឺលោកយ៉ូសែប និងលោកយ៉ូសែបមានជំនឿ និងទុកចិត្តព្រះជាម្ចាស់ បានប្ដូរគម្រោងការរបស់គាត់ដោយព្រមទទួលព្រះនាងម៉ារី និងព្រះកុមារយេស៊ូជាគ្រួសាររបស់គាត់។
ជាមួយគ្នានេះ លោកអភិបាលក៏បានលើកទឹកចិត្តឲ្យគ្រីស្តបរិស័ទព្រមចូលរួមក្នុងគម្រោងការរបស់ព្រះជាម្ចាស់ «ដោយដឹងថាព្រះជាម្ចាស់មិនបោះបង់យើង និងយើងជាគ្រីស្តបរិស័ទ យើងមានជំនឿ និងសេចក្ដីសង្ឃឹមថែមទៀត។»
លោកអភិបាលរំលឹកថា សូមសម្លឹងមើលសន្តយ៉ូសែបជាឪពុក។ លោកយ៉ូសែប បានយកចិត្តទុកដាក់ចិញ្ចឹមគ្រួសារ និងអប់រំកូនឱ្យចេះមានទំនាក់ទំនងនិងមានជំនាញ។ «ជំនឿរបស់យើងជាគ្រីស្តបរិស័ទយកចិត្តទុកដាក់លើតួនាទីរបស់យើងខ្ពស់ ដោយធ្វើដំណើរទៅមុខ។ ចូរយើងទូលអង្វរតាមរយៈសន្តយ៉ូសែប ឱ្យរកឃើញសេចក្ដីសង្ឃឹម សុខសន្តិភាព។»
យុវជន សេង ចាន់ធី បាននិយាយថា «សន្តយ៉ូសែបគឺជាកម្លាំង ដោយរាល់បញ្ហារបស់ខ្ញុំទាំងក្នុងព្រះសហសគមន៍ និងសង្គមខាងក្រៅ ខ្ញុំអធិដ្ឋាន សន្តយ៉ូសែបបានផ្ដល់កម្លាំងចិត្តឱ្យខ្ញុំមានចិត្តតស៊ូព្យាយាម។»
យុវជនសកម្មចាន់ធីបានឱ្យដឹងទៀតថា ព្រះវិហារសន្តយ៉ូសែបសែនសុខកកើតមានឡើងក្រោយពីមានការជម្លៀសពលរដ្ឋនៅតំបន់ប៊ូឌីង សង្កាត់ទន្លេបាសាក់ ក្នុងឆ្នាំ២០០១ ដោយមានគ្រីស្តបរិស័ទត្រឹមតែ៥ឬ៦នាក់ប៉ុណ្ណោះ ហើយពេលនេះ មានចំនួនគ្រីស្តបរិស័ទប្រមាណជា៣០គ្រួសារ។
ចាន់ធីបានឱ្យដឹងទៀតថា ដោយមានការប្រទានពរពីព្រះជាម្ចាស់ និងសន្តយ៉ូសែប បានធ្វើឱ្យពួកយើងមានជំនឿ ធ្វើឱ្យព្រះសហគមន៍មានជីវិតរហូតមកដល់សព្វថ្ងៃ។ ព្រះសហគមន៍នេះ តែងតែជួយដល់អ្នកក្រីក្រ ដោយមានការចែកអំណោយ២ដងក្នុងមួយឆ្នាំ គឺក្នុងបុណ្យព្រះយេស៊ូប្រសូត និងបុណ្យព្រះយេស៊ូមានព្រះជន្មថ្មីដ៏រុងរឿង តាមរយៈការចូលរួមសហការគ្នារវាងគ្រីស្តបរិស័ទ និងព្រះសហគមន៍ជាប្រចាំផងដែរ៕
ដោយ៖ដាលីស
