កុមារជាង៣០០នាក់ បានជួបជុំគ្នាបោះជំរំនៅមជ្ឈមណ្ឌលភ្នំពេញថ្មី រិះគិតនិងចូលរួមរៀនអំពីការអភិវឌ្ឍន៍ចំណេះដឹងផ្នែកសង្គមនិងកិច្ចការងាររស់នៅប្រចាំថ្ងៃ ក្រោមប្រធានបទ «អនាគតភ្លឺស្វាងសម្រាប់កុមារទាំងអស់» ដែលដឹកនាំដោយការិយាល័យ យុវជន ជំទង់ កុមារ និងគ្រួសារ នាថ្ងៃទី២៧-២៩ ខែឧសភា ឆ្នាំ២០២២។
កុមារីអាយុ ៨ឆ្នាំ លីន ដាណេ មកពីព្រះសហគមន៍ព្រែកតាទែន បាននិយាយថា នេះជាលើកទី១ដែលនាងបានចូលរួមបោះជំរំនេះ។ ដាណេបន្តថា «ខ្ញុំសប្បាយដោយបានចួបមិត្តភក្តិច្រើន ហើយបានកាដូរថែមទៀត។» កុមារី ដាណេ ប្រាប់ទៀតថា ក្រៅពីសប្បាយ នាងបានរៀនរាំ រៀនរើសសំរាម រៀនសំអាត រៀនសម្ដែង «ហើយអ្វីដែលខ្ញុំបានរៀនជួយឱ្យខ្ញុំក្លាយជាកូនល្អ។»
កញ្ញា វ៉ាន់ សុផារី ជាមេកាយឫទ្ធិមកពីព្រះសហគមន៍ចំប៉ានៃមណ្ឌលសកម្មភាពទន្លេមេគង្គ ដែលជាតំបន់មួយមានកុមារវៀតណាមបាននិយាយថា នាងបានចូលរួមក្នុងការិយល័យយុវជន ជំទង់ កុមារនិងគ្រួសារបានរយៈពេលបីឆ្នាំមកហើយ។
សុផារី ឲ្យដឹងទៀតថា ឆ្លងតាមបទពិសោធនៃការដឹកនាំកុមារ និងតាមរយៈការណែនាំរបស់បងៗធ្វើឲ្យនាងស្គាល់សមត្ថភាពខ្លួនឯង។ យុវតីរូបនេះ បន្ថែមថា “នៅកម្មវិធីនេះធ្វើឱ្យខ្ញុំមានបទពិសោធន៍ខាងល្បែងកម្សាន្តជាច្រើន ដើម្បីនាំយកទៅលេងជាមួយកុមារនៅព្រះសហគមន៍ខ្ញុំក្រោយពេលត្រលប់ទៅវិញ”។
សុផារី បានបន្តថា «១. ពង្រីក្រុមកាយឫទ្ធិឱ្យមានកុមារកាន់តែច្រើន ដោយប្រមូលកុមារនៅក្រៅភូមិបន្ថែម។ ២. ជួយណែនាំកុមារឱ្យនិយាយភាសាខ្មែរឱ្យបានច្រើន ដើម្បីអាចរួបរួមគ្នាជាមួយក្មេងក្នុងភូមិនិងក្រៅភូមិ។ ៣. អនុវត្តនូវអ្វីដែលយើងមានបទពិសោធនៅក្នុងកម្មវិធីនេះ។»
លោកស៊ាន់សារឿន ប្រធានការិយាល័យយុវជន ជំទង់ កុមារ និងគ្រួសារបានឱ្យដឹងថា រយៈពេល៣ថ្ងៃនេះ គឺជាកម្មវិធីបោះជំរំរបស់កុមារកាយឫទ្ធិ ដែលមានកុមារមកពីព្រះសហគមន៍នានាក្នុងភូមិភាគភ្នំពេញ។
លោកសារឿន បន្ថែមថា កម្មវិធីនេះបង្កើតឡើងដើម្បីឱ្យកុមារទទួលបាននូវ អំណរសប្បាយ ចេះបង្កើតមិត្តថ្មីតាមរយៈទំនាក់ទំនងរវាងកុមារនិងកុមារ និងឱ្យកុមារទទួលបាននូវការអប់រំមានសីលធម៌នៃការរស់នៅ អនាម័យ ចេះស្រឡាញ់បរិស្ថាន ស្រឡាញ់ព្រះសហគមន៍ និងស្រឡាញ់គ្រួសាររបស់គេ។
ក្នុងពេលចាប់ផ្តើមនាល្ងាចថ្ងៃដំបូង កុមារនៃព្រះសហគមន៍ទាំងអស់បានចូលរួមរៀបចំ និងអធិដ្ឋានតេហ្សេជាមួយគ្នាផងដែរ។
លោកសារឿន បញ្ជាក់ទៀតថា «ខ្ញុំបានឃើញថា រយៈពេល៣ថ្ងៃមកនេះ(យើង)ទទួលបានជោគជ័យមែនទែន ដោយមានទាំងបរិយាកាស អំណរសប្បាយ។» លោកបន្ថែមទៀតថា កុមារមានទំនាក់ទំនងជាមិត្តភក្តិ និងចូលរួមក្នុងសកម្មភាពជាក្រុមគឺ សម្ដែង លេងកម្សាន្ត រស់នៅជាមួយគ្នា និងអធិដ្ឋានជាមួយគ្នា។
តាមរយៈសកម្មភាពរបស់កុមារក្នុងប៉ុន្មានថ្ងៃនេះ លោកសារឿន បញ្ជាក់ថា សកម្មភាពទាំងនេះជាកម្លាំងនាំឱ្យការិយាល័យយុវជន ជំទង់ កុមារ និងគ្រួសាររបស់យើងមានកម្លាំងបន្ថែមទៀត ដោយមើលឃើញពីផលផ្លែទាំងនេះ។
ការិយាល័យយុវជន ជំទង់ កុមារ និងគ្រួសារនៃព្រះសហគមន៍កាតូលិកភូមិភាគភ្នំពេញ បានបង្កើតឡើងក្នុងឆ្នាំ២០០៣ មានទិសដៅតម្រង់ទិសរបស់កុមារ ជំទង់ យុវជន និងគ្រួសារឲ្យចូលរួមក្នុងព្រះសហគមន៍និងសង្គម អប់រំរំផ្តល់ចំណេះដឹងបន្ថែមអំពីរបៀបរស់នៅផ្សារភ្ជាប់ជាមួយជំនឿ។
នៅថ្ងៃទី៣នៃកម្មវិធីបោះជំរំកាយឫទ្ធិ មានកុមារជាងមួយនាក់ផ្សេងទៀតដែលរស់នៅក្បែរតំបន់មជ្ឈមណ្ឌលភ្នំពេញថ្មី បាននាំគ្នាមកចូលរួមអបអរកម្មវិធីសិទ្ធិកុមារអន្តរជាតិផងដែរ ដែលធ្វើឲ្យចំនួនសរុបបានកើនឡើងជាង៥០០នាក់។
នៅក្នុងឱកាសនេះដែរ លោកអភិបាលអូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ មានប្រសាសន៍ថា ថ្ងៃនេះ យើងនឹកដល់ថ្ងៃ១មិថុនា ដែលយើងគោរពសិទ្ធិកុមារអន្តរជាតិ និងមានប្រធានបទ “អនាគតភ្លឺស្វាងសម្រាប់កុមារទាំងអស់” គឺមានន័យថាសម្រាប់កុមារនៅក្នុងពិភពលោកទាំងមូល។
លោកអភិបាលអូលីវីយ៉េ រំឭកដល់កុមារអំពីរបៀបដែលធ្វើឱ្យមានអនាគតភ្លឺស្វាង ដោយយកពេលស្ងៀមស្ងាត់ដើម្បីគិតពីកិច្ចការដែលកុមារម្នាក់ៗចង់ធ្វើនាពេលអនាគត និងដើម្បីឱ្យអនាគតជោគជ័យដោយត្រូវ យកចិត្តទុកដាក់លើសិក្សា យកចិត្តទុកដាក់លើបងប្អូនឪពុកម្ដាយទាំងក្នុងគ្រួសារនិងក្នុងសង្គម យកចិត្តទុកដាក់លើច្បាប់កាយឫទ្ធិ យកចិត្តទុកដាក់ ស្រឡាញ់បរិស្ថាន និងយកចិត្តទុកដាក់អធិដ្ឋានជាមួយព្រះជាម្ចាស់ដែលប្រទានជីវិតឱ្យយើងជាប្រចាំ។
ជាមួយនឹងកម្មវិធីនោះដែរ ការិយាល័យយុវជន ជំទង់ កុមារនិងគ្រួសារ បានរៀបចំ អំណោយបន្តិចបន្តួចសម្រាប់កុមារទាំងអស់។ ក្រោយកម្មវិធីនេះ កុមារកាយឫទ្ធិបាននាំគ្នាចួលរួមអភិបូជារួមគ្នា ដើម្បីបិទកម្មិវិធី។
លោកអភិបាលអូលីវីយ៉េ មានប្រសាសន៍ណែនាំនៅក្នុងធម្មទេសនាលោកបានរំឭកដល់កុមារ និងគ្រីស្តបរិស័ទទាំងអស់ដើម្បីយកឱកាសនេះចូលរួមជាមួយកូនក្មេងទាំងអស់ដែលកំពុងរងទក្ខលំបាក គ្មានម្ហូបអាហារគ្រប់គ្រាន់ប្រមាណជា២០លាននាក់ និងរាប់លានដែលស្លាប់ដោយខ្វះម្ហូបនិងសេវាកម្មសុខភាពផងដែរ។
ឆ្លៀតក្នុងឱកាសនេះ លោកអភិបាល ស្នើសុំឲ្យលោកបូជាចារ្យ និងគណៈកម្មការនៅតាមព្រះសហគមន៍កាតូលិកភូមិភាគភ្នំពេញទាំងអស់ក្នុងឆ្នាំនៃមហាសន្និបាត២០២១-២០២៣ រិះគិតធ្វើយ៉ាងណាឱ្យកុមារមានឱកាស ចួបជុំគ្នា បង្កើតមិត្តថ្មី យល់អំពីជីវិត ស្រឡាញ់បរិស្ថាន ស្រឡាញ់ព្រះជាម្ចាស់និងអ្នកដទៃ ដើម្បីឱ្យព្រះសហគមន៍របស់យើងទៅជាមហាគ្រួសារមួយដែលប្រមូលក្មេងគ្រប់ទីកន្លែង។
លោកបន្ថែមថា បទពិសោធទាំងនេះរួមជាមួយកូនក្មេងមួយចំនួនដែលមិនមែនជាគ្រីស្តបរិស័ទ ជាឱកាសមួយដើម្បីធ្វើដំណើរជាមួយគ្នា ជាឱកាសមួយដើម្បីស្គាល់ព្រះសហគមន៍កាតូលិក និងរិះគិតពីដំណើរជីវិតជាកុមារនៅក្នុងសង្គមបច្ចុប្បន្ននេះ។
កម្មវិធីបោះជំរំកុមារកាយឫទ្ធិនេះ មានកុមារមកពីព្រះសហគមន៍មណ្ឌលសកម្មភាពចំនួន៦គឺ ភ្នំពេញខាងជើង ភ្នំពេញខាងត្បូង ភ្នំពេញថ្មី តាខ្មៅ បាសាក់ និងមេគង្គ។ ព្រះសហគមន៍ក៏បានបង្ហោះប៉េងប៉ោងចូលរួមអបអរសាទរកុមារទាំងអស់ទូទាំងពិភពលោកផងដែរ៕
ដោយដាលីស
