គ្រីស្តបរិស័ទកាតូលិកដែលជាជនចាស់ជរា និងអ្នកជំងឺចំនួន៥០នាក់បានមកចូលរួមទទួលប្រេងផ្តល់កម្លាំងសម្រាប់ជីវិតរស់នៅប្រចាំថ្ងៃរួមជាមួយជំនឿ ពីលោកបូជាចារ្យ ប៉ូលរឿង ឆ័ត្រសិរី កាលពីថ្ងៃទី៣០ ខែកក្កដាខាងមុខនេះនៅព្រះវិហារសន្តយ៉ូសែប(ផ្សារតូច)នារាជធានីភ្នំពេញ។
តាមប្រសាសន៍របស់លោក រឿង ឆ័ត្រសិរី បូជាចារ្យទទួលខុសត្រូវមណ្ឌលកម្មភាពភ្នំពេញខាងជើង និងជាអធបតីក្នុងពិធីនេះបានលើកឡើងថា ប្រេងដែលត្រូវលាបជូនលោកតា លោកយាយនាពេលនេះគឺ ជួយឲ្យពួកគាត់ធ្វើដំណើរទៅមុខដោយក្តីសង្ឃឹម ឬក៏ជួយឲ្យយើងនឹកឃើញពីការត្រៀមខ្លួនជួបជាមួយព្រះជាម្ចាស់នៅពេលខាងមុខ។
ប្រេងដែលលោកបូជាចារ្យបានលាបជូនចាស់ជរា គឺជាប្រេងអូលីវ ដែលត្រូវបានប្រសិទ្ធពរដោយលោកអភិបាល ក្លាយជាប្រេងពិសិដ្ឋ ជាសញ្ញាសម្គាល់នៃវត្តមានរបស់ព្រះជាម្ចាស់គង់នៅជាមួយមនុស្សលោកតាមរយៈអគ្គសញ្ញា។
អគ្គសញ្ញាលាបប្រេង ជាអគ្គសញ្ញាមួយក្នុងប្រពៃណីរបស់ព្រះសហគមន៍កាតូលិក គឺជាប្រេងផ្តល់កម្លាំង ជាពិសេសសំរាប់អ្នកទន់ខ្សោយ ឬអ្នកដែលកំពុងមានជំងឺ ដោយធ្វើក្នុងព្រះនាមព្រះជាម្ចាស់ (យក ៥,១៣-១៦)។
ស្ត្រីវ័យ៧០ឆ្នាំ អង្គុយលើរទេះរុញ ព្រោះជើងទាំងពីរពិកាដោយសារគ្រោះថ្នាក់ចរាចរណ៍ ឈ្មោះនូ រំពឹង បានពោលឡើងថា «ខ្ញុំពិការជើង តែខ្ញុំមិនពិការជំនឿទេ។ ខ្ញុំមកព្រះវិហាជារៀងរាល់ថ្ងៃអាទិត្យដោយសាររទេះមួយនេះ ដើម្បីស្តាប់ព្រះបន្ទូល និងអធិដ្ឋាន។»
ស្ត្រីរូបនេះបន្ថែមថា «ខ្ញុំធូស្រាលក្នុងចិត្ត មានកម្លាំង លែងខ្វាយខ្វល់ជំងឺដង្កាត់អ្វីទាំងអស់ ហើយអ្វីដែលកាន់តែពិសេសនោះ ខាងផ្លូវវិញ្ញាណរបស់យើងកាន់រឹងមាំ»។
ការទទួលប្រេងក្នុងថ្ងៃនេះ គឺមានអត្តន័យណាស់សំរាប់បងប្អូនគ្រីស្តបរិស័ទ។ នេះជាការបញ្ជាក់របស់អ្នកស្រីឆ្មារ យូ ប្រាដក ជាគ្រីស្តបរិស័ទមា្នក់កំពុងតស៊ូខ្លាំងជាមួយជំងឺមហារីកបានឲ្យដឹងថា «ប្រេងបានជួយរំលឹកខ្ញុំ និងគ្រីស្តបរិស័ទដទៀត កុំឲ្យចេញឆ្ងាយពីទ្រង់(ព្រះជាម្ចាស់) គឺមានតែទ្រង់មួយបានហើយ។ ជាពិសេសជួយរំលឹកបងប្អូនមួយចំនួនដែលបោះបង់ព្រះជាម្ចាស់ចោល ឲ្យត្រឡប់មកវិញ រួមរស់ជាមួយទ្រង់ លះបង់អំពើរបាបដែលខ្លួនធ្វើកន្លងមកចោល។»
លោកបូជាចារ្យឆ័ត្រសិរី បានឲ្យដឹងទៀតថា ការយកចិត្តទុកដកា់លើមនុស្សចាស់ជរា ឬលោកតា លោកយាយ ជាការស្នើសុំរបស់សម្តេចប៉ាប ហ្រ្វង់ស៊ីស្កូ ដែលលោកបានរំលឹកថា ពួកគាត់ជាគ្រឹះដ៏សំខាន់របស់ព្រះសហគមន៍យើង ដោយសារពួកគាត់បានឆ្លងកាត់បទពិសោធ និងកិច្ចការរាប់មិនអស់ក្នុងជីវិត ហើយក៏ជាគំរូរបស់យើងគ្រប់ៗគ្នា។
ក្នុងកម្មវិធីនោះមានប្រារព្ធពិធីអភិបូជា ជូនដល់ពួកគាត់ផងដែរ។ ក្នុងនោះលោកបូជាចារ្យអធិបតី បានរំលឹកដល់គ្រីស្តបរិស័ទនូវចំនួន៣គឺ ធ្វើបុណ្យខាងផ្លូវកាយ ធ្វើបុណ្យតាមផ្លូវវាចា ធ្វើបុណ្យតាមផ្លូវចិត្តនិងផ្លូវវិញ្ញាណ។
លោកពន្យល់ដូច្នេះថា ធ្វើបុណ្យខាងផ្លូវកាយ គឺការចែករំលែកអ្វីដែលយើងមានទៅអ្នកដទៃ និងទទួលខុសត្រូវចំពោះតួនាទីរបស់ខ្លួនរៀងៗខ្លួន។ ចំណែកធ្វើបុណ្យតាមផ្លូវវាចា គឺមិនរអ៊ូរទាំច្រើន និយាយអ្វីដែលល្អ អប់រំកូនចៅ ឬអ្នកដទៃទៅរកផ្លូវរីកចំរើន និងសេចក្តីល្អនៅក្នុងជីវិត។ និងធ្វើបុណ្យតាមផ្លូវចិត្តនិងផ្លូវវិញ្ញាណ គឺត្រូវព្យាយាមអធិដ្ឋានឲ្យកូនចៅនិងអ្នកដទៃមានសេចក្តីសុខ និងសុភមង្គល ហើយត្រូវមានចិត្តស្ងប់ស្ងាត់ ការរស់នៅមានក្តីសង្ឃឹម និងរីករាយ និងធ្វើជាគំរូល្អ ណែនាំកូនចៅឲ្យមានជំនឿកាន់តែរឹងមាំលើព្រះជាម្ចាស់ម្ចាស់៕
ដោយ ឆាក លាំង
