មណ្ឌលនិស្សិតនៃព្រះសហគមន៍កាតូលិកបានបង្កើតវេទិកាជជែកវែកញែកស្ដីពី «ការអប់រំពីចម្ងាយ(តាមប្រព័ន្ធអនឡាញ) នៅកម្ពុជាបានផ្ដល់ផលល្អជាងផលប៉ះពាល់» ដែលមានសិស្សនិស្សិត២ក្រុមដែល ចូលរួមគឺមានក្រុមមតិស្រប និងក្រុមមតិបដិសេធ នារសៀលថ្ងៃទី៣១ ខែកក្កដា ឆ្នាំ២០២២។
លោកប៊ុន សុបិន្ត គណៈគ្រប់គ្រង មណ្ឌលនិស្សិតនៃព្រះសហគមន៍កា បានឲ្យដឹងថា វេទិកាជជែកវែកញែកនេះ គឺជាវេទិកាសេរីមួយ ផ្ដល់ឱកាសឲ្យនិស្សិតប្រើប្រាស់សមត្ថភាព ភាពក្លាហាន សាមគ្គីជាក្រុម ហ៊ានបញ្ចេញមតិយោបល់ ទស្សនៈគាំទ្រឬបដិសេធទៅលើ ប្រធានបទ និងចេះពិចារណា វិភាគដោយផ្អែកទៅលើសីលធម៌ គុណធម៌ អំណះអំណាង និងការស្រាវជ្រាវជាចម្បង។
មណ្ឌលនិស្សិតព្រះសហគមន៍កាតូលិកកម្ពុជាបានកកើតឡើងតាំងពីឆ្នាំ១៩៩៩ ដើម្បីទទួលឲ្យស្នាក់នៅ និងអាហារូបករណ៍ដល់និស្សិតដែលមកពីបណ្ដាខេត្តមួយចំនួនរបស់ព្រះសហគមន៍កាតូលិកនៅក្នុងប្រទេសកម្ពុជា តាមសកលវិទ្យាល័យនានាក្នុងរាជធានីភ្នំពេញ។
ជាមួយនឹងភាពរីករាយបន្ទាប់ទទួលជ័យជំនះលេខមួយនៅក្នុងកម្មវិធីជជែកវែកញែក កញ្ញា កេត ស្រីពៅ តំណាងក្រុមបដិសេធ បាននិយាយថា ក្រុមរបស់នាងពិតជាមានមោទនភាពចំពោះជ័យលាភីនេះ ព្រោះការសហការគ្នា និងរួមគ្នាជាគំនិតតែមួយ។
និស្សិតឆ្នាំទី២រូបនេះបន្តថា រាល់ឯកសារស្រាវជ្រាវនិស្សិតរបស់យើងនៅមានកម្រិត ដោយសារឯកសារភាគច្រើនជាភាសាបរទេស ដែលធ្វើឲ្យដំណើរការយឺត។ ស្រីពៅ «ឯកសារជាភាសាបរទេស មកបកប្រែដើម្បីបញ្ជូលអត្ថន័យលាយគ្នាជាមួយឯកសារនៃប្រទេសកម្ពុជា ដើម្បីឲ្យមានភាព ច្បាស់លាស់ដែលអាចក្រុមនាងខ្ញុំលើកឡើងជាទឡ្ហីករណ៍។»
ស្រីពៅបានឲ្យដឹងថាកម្មវិធីនេះ បានជួយដល់រូបនាង ឲ្យមានភាពក្លាហាន ហើយនាងនឹងព្យាយាមអភិវឌ្ឍ សមត្ថភាពខ្លួនឯងទៅតាមការវាយតម្លៃរបស់គណៈកម្មាសម្រាប់ពេលអនាគត។
យុវតី សំ វិច្ឆិកា អាយុ២០ឆ្នាំ មកពីក្រុមស្របបានឲ្យដឹងថា ក្រុមរបស់នាងសូមអរគុណដល់ដំបូន្មានល្អៗរបស់គណៈកម្មានូវចំណុចខ្វះខាតរបស់ ក្រុមនាង ដើម្បីបំពេញបន្ថែមសម្រាប់ការប្រកួតលើកក្រោយ។
វិច្ឆិកាបាននិយាយទៀតថា ការសិក្សាស្រាវជ្រាវនិងពង្រឹងសមត្ថភាពរបស់ខ្លួនត្រូវធ្វើគ្រប់ពេលវេលា ទាំងនៅសាលានិងពេលទំនេរ ដើម្បីបំពេញនូវជំនាញក្នុងរយៈពេល៤ឆ្នាំដែលសិក្សានិងស្នាក់នៅក្នុងមណ្ឌលឲ្យមានប្រសិទ្ធភាពនិងគុណភាព ។
បច្ចុប្បន្ននេះមណ្ឌលនិស្សិតព្រះសហគមន៍កាតូលិក មាននិស្សិតកំពុងស្នាក់នៅនិងទទួលអាហារូបករណ៍ ប្រមាណជា៤៥នាក់។ ជាង ២០ឆ្នាំមកនេះព្រះសហគមន៍កាតូលិក បានជួយនិស្សិតក្រីក្រប្រមាណជា៤០០នាក់ឲ្យរៀនចប់មហាវិទ្យាល័យនិងមានជំនាញមួយច្បាស់។
លោកសុបិន្ត បានឲ្យដឹងថា មណ្ឌលបានយកចិត្តទុកដាក់អភិវឌ្ឍនិស្សិត ឲ្យមានទាំងចំណេះដឹង ប្រាជ្ញាស្មារតីនិងបំនិនជីវិត ដោយបង្កើតឲ្យមានកម្មវិធីអប់រំផ្សេងៗជាច្រើនដូចជា ទស្សនវិជា្ជ ភាសាអង់គ្លេស សិល្បៈ និងសិក្ខាសាលាផ្សេងៗ ដោយរួមទាំងវេទិកាជជែកវែកញែក៕
ដោយចាន់ ម៉ានុត
