ព្រះសហគមន៍សន្តសិលា និងសន្តប៉ូលភ្នំពេញថ្មី បានរៀបចំកម្មវិធីបិទវគ្គថ្នាក់អប់រំជំនឿ នាថ្ងៃទី៧ ខែសីហា ឆ្នាំ២០២២ ដោយមានលោកឪពុក សិលា សួន ហង្សលី ជាអធិបតី និងមានបងស្រី គ្រូអប់រំជំនឿ និងកុមារនិងមនុស្សពេញវ័យដែលទទួលការអប់រំជំនឿប្រហែលជាង១០០នាក់បានចូលរួម។
ថ្លែងក្នុងកម្មវិធីនេះលោកបូជាចារ្យ សិលា សួន ហង្សលី ជាបូជាចារ្យទទួលខុសត្រូវព្រះសហគមន៍សន្តសិលា និងសន្តប៉ូល ភ្នំពេញថ្មី មានប្រសាសន៍ថា ការអប់រំជំនឿមិនគ្រាន់តែបង្រៀន គឺយើងចែករំលែកបទពិសោធនៃជំនឿ។ ហើយការបិទវគ្គ នេះនឹងបន្តបើកឡើងវិញនៅ ខែតុលាខាងមុខនេះ។
ជាទូទៅកម្មវិធីអប់រំជំនឿរបស់ព្រះសហគមន៍កាតូលិក ធ្វើឡើងស្របតាមពេលវេលាសិក្សារបស់សាលារដ្ឋ។ ក្នុងឱកាសនោះ លោកបូជាចារ្យបានរំលឹកដល់សិស្សអប់រំជំនឿ ឲ្យមកព្រះវិហារដើម្បីចូលរួមអភិបូជានិងស្តាប់ព្រះបន្ទូល។ លោកថា «កុំភ្លេចមកចូលរួមអភិបូជា ដើម្បីស្តាប់ព្រះបន្ទូល និងអធិដ្ឋានជាមួយគ្នា ហើយក៏ជាពេលវេលាដើម្បីមើលពីជំនឿផ្ទាល់ខ្លួន។»
កម្មវិធីបិទវគ្គសិក្សានេះ បានធ្វើឡើងដោយមានប្រធានបទ “ដំណើរក្នុងជំនឿជាមួយគ្នាដូចគ្រួសារតែមួយ”។ លោកបូជាចារ្យបន្ថែមថា ក្នុងគ្រួសារយើងត្រូវស្រឡាញ់គ្នាទៅវិញទៅមកដូចព្រះយេស៊ូបានស្រឡាញ់យើង ព្រោះបើឥតមានសេចក្តីស្រឡាញ់យើងដើរជាមួយគ្នាមិនបានទេ។
លោកបន្តថា ឱ្យយើងរៀនរស់នៅតាមរបៀបព្រះជាម្ចាស់ គឺលើសពីធម្មជាតិមានន័យថា យើងហ៊ានលះបង់អ្វីៗទាំងអស់សម្រាប់អ្នកដទៃ។
យុវជន ស៊ិន វិចិត្រ ជាយុវសិស្សវិទ្យាល័យម្នាក់ និងជាអ្នកដែលបានមកទទួលការអប់រំជំនឿនៅព្រះសហគមន៍សន្តសិលា និងសន្តប៉ូល ភ្នំពេញថ្មី បានប្រាប់ថា គាត់រីករាយដែលបានទទួលការអប់រំជំនឿនៅទីនេះក្នុងរយៈពេលជាងមួយឆ្នាំនេះ។
វិចិត្របន្តថាតាមរយៈកម្មវិធីអប់រំនេះ ធ្វើឲ្យលោកបានស្គាល់អំពីជីវិតរបស់ព្រះយេស៊ូ និងធ្វើឱ្យគាត់មានជំនឿកាន់តែខ្លាំងឡើងៗទៅលើព្រះអង្គ តាមរយៈការលះបង់ព្រះជន្មរបស់ព្រះអង្គដើម្បីលាងអំពើបាបរបស់មនុស្សលោក។
វិចិត្រ បានបន្តថា រយៈពេលនៃការឈប់សម្រាក២ខែខាងមុខនេះ «ខ្ញុំនឹងពង្រឹងជំនឿខ្លួនឯងតាមរយៈការខិតខំចូលរួមអភិបូជា រក្សាជំនឿផ្ទាល់ខ្លួន និងបង្ហាញធម៌មេត្តាករុណាដល់អ្នកក្រីក្រតាមលទ្ធភាពដែលអាចធ្វើទៅបាន។»
ជាមួយគ្នានេះដែរ វិចិត្របានឲ្យដឹងថា គាត់នឹងបន្តទទួលការអប់រំជំនឿរហូតបានទទួលអគ្គសញ្ញាជ្រមុជទឹកនៅថ្ងៃខាងមុខ។
ថ្នាក់អប់រំជំនឿនៅព្រះសហគមន៍សន្តសិលា និងសន្តប៉ូល ភ្នំពេញថ្មី មានចំនួន១០ក្រុម មាន៥ក្រុមសម្រាប់អប់រំជំនឿកុមារ និង៥ក្រុមទៀតសម្រាប់អប់រំជំនឿមនុស្សពេញវ័យ។ តាមធម្មតា ក្នុងមួយឆ្នាំដំណើរការនៃការអប់រំជំនឿរយៈពេល១០ខែ ដោយចាប់ផ្តើមចូលរៀននៅខែតុលានិងបិទវគ្គនៅខែសីហា ដែលរៀនរយៈពេល១ម៉ោងជារៀងរាល់ថ្ងៃអាទិត្យ។ កម្មវិធីនេះទទួលខុសត្រូវដោយដូនជីម៉ារីនីឡា នៃក្រុមបុត្រីព្រះនាងម៉ារីជាទីពឹងពំនាក់៕
ដោយង៉ែត សុធីរិទ្ធ
