កុមារជិត២០០នាក់នៃមណ្ឌលសកម្មភាពភ្នំពេញខាងជើង បានចូលរួមជាមួយគ្នាបោះជំរំ រិះគិតលើបេសកកម្មក្នុងនាមជាកុមារគ្រីស្តបរិស័ទ ធ្វើនៅព្រះវិហារសន្តយ៉ូសែប ផ្សារតូចនារាជធានីភ្នំពេញ។
លោកបូជាចារ្យ ប៉ូល រឿង ឆ័ត្រសិរី ជាប្រធានមណ្ឌលសកម្មភាពព្រះសហគមន៍កាតូលិកភ្នំពេញខាងជើងមានប្រសាសន៍ថា កុមារទាំងនោះភាគច្រើនជាកូនគ្រីស្តបរិស័ទ និងកំពុងរៀនអប់រំជំនឿ ហើយកម្មវិធីបោះជំរំនេះ គឺដើម្បីឲ្យពួកគាត់អនុវត្តនូវអ្វីដែលគាត់បានរៀន។
លោកបូជាចារ្យបន្ថែមថា ការជួបជុំនេះ គឺដើម្បីឱ្យកុមារទាំងអស់ស្គាល់គ្នា និងមានទំនាក់ទំនងល្អនៅពេលអនាគត ទោះបីជាពួកគាត់មកពីព្រះសហគមន៍ផ្សេងៗក៏ដោយ។ លោកបន្តថា នៅពេលធំឡើងពួកគាត់ក៏អាចជួយព្រះសហគមន៍ឱ្យមានភាពរឹងមាំ ដោយមានការសហការគ្នា លើកទឹកចិត្តគ្នា និងរស់នៅជាសាក្សីនៃជំនឿ។
កម្មវិធីបោះជំរំកុមារនេះ ទទួលកុមារពីអាយុ៥ដល់១៨ឆ្នាំ ដែលមកពីព្រះសហគមន៍មួយចំនួនក្នុងមណ្ឌលសកម្មភាពភ្នំពេញខាងជើង រួមមាន៖ផ្សារតូច ព្រែកតាទែន សែនសុខ ស្វាយប៉ាក អិរយក្សត្រ ពោធិ៍ធំ និងក្ដីកណ្ដាល។
លោកឆ័ត្រសិរីបញ្ជាក់ថា ដូច្នេះអ្វីដែលគាត់គួរតែធ្វើគឺបង្ហាញជំនឿរបស់គាត់តាមអ្វីដែលគាត់អាចធ្វើបានរួមទាំងការបង្ហាញជំនឿដល់អ្នកនៅជុំវិញខ្លួនរបស់ពួកគាត់ផងដែរ។
លោកបូជាចារ្យបន្ថែមថា ទោះបីជាព្រះសហគមន៍មានគ្នាតិចនៅក្នុងសង្គម ប៉ុន្តែពេលឃើញមនុស្សជួបបញ្ហា គាត់ត្រូវបញ្ចេញសកម្មភាព។ «គាត់អាចធ្វើបុណ្យ ធ្វើទាន តាមសមត្ថភាពរបស់គាត់ ចេះសន្សំសំចៃ និងជួយតាមកម្លាំងរបស់គាត់។» លោកឆ័ត្រសិរីបញ្ជាក់។
នៅក្នុងប្រទេសកម្ពុជា គ្រីស្តសាសនានិកាយកាតូលិកមានប្រហែល២០០០០នាក់ប៉ុណ្ណោះ ក្នុងចំណោមប្រជាជនជិត១៦លាននាក់។
នៅក្នុងកម្មវិធីនោះដែរ កុមារទាំងអស់បានស្នាក់នៅនិងរៀនអំពីរបៀបរស់នៅជាក្រុម សិក្សាបន្ថែមអំពីជំនឿ ការជួយគ្នាទៅវិញទៅមក រៀនពីសុភាវធម៌ សុជីវធម៌ និងចេះស្រឡាញ់បរិស្ថាន និងលែងល្បែងកំសាន្តនានា។
លោក ហេង ច័ន្ទរិទ្ធី ជាអ្នកសម្របសម្រួល និងជាប្រធានក្រុមយុវជននៅព្រះវិហារសន្តយ៉ូសែបផ្សារតូច បានឱ្យដឹងថា ការបោះជំរំកុមារលើកនេះពួកយើងចង់ប្រមូលផ្ដុំយុវជនក៏ដូចជាក្មេងៗនៅតំបន់មណ្ឌលសកម្មភាពភ្នំពេញខាងជើងចូលរួមគ្នាជាធ្លុងតែមួយតាមរយៈសកម្មភាពផ្សេងៗដែលទាក់ទងទៅនឹងសាររបស់សម្ដេចប៉ាបក្នុងសន្និបាតព្រះសហគមន៍សកល។
កម្មវិធីដែលបានធ្វើឡើងរយៈពេល៣ថ្ងៃ គឺពីថ្ងៃទី១១-១៤ ខែសីហា កន្លងទៅ បានចែកចេញជាបីផ្នែកសំខាន់ៗ។ ប្រធានក្រុមយុវជនរូបនេះ បន្ថែមថា ការជួបជុំគ្នានៅថ្ងៃសុក្រ គឺឲ្យកុមារចូលរួម ជាមួយគ្នា ស្គាល់គ្នារាប់ជាគ្នាជាមិត្តភក្តិ។
រីឯថ្ងៃសៅរ៍យើងគិតពីកម្លាំងជម្នះ គឺមានន័យថាក្រោយពេលដែលគាត់មានមិត្តភក្តិហើយ កុមារប្រឈមមុខនឹងការឈ្លោះទាស់ទែងគ្នា និងមានការបែកបាក់គ្នា ដូច្នេះគណៈកម្មការយើងបានរៀបចំដំណោះស្រាយ ធ្វើយ៉ាងណាឱ្យគាត់បានត្រូវរ៉ូវគ្នាវិញ។ ច័ន្ទរិទ្ធីបន្ថែមថា ថ្ងៃបញ្ចប់គឺបញ្ចៀបអំពីបេសកកម្ម ដើម្បីឲ្យពួកគាត់អាចបង្កើតកម្មវិធីនានា និងដើម្បីនាំកុមារដែលចង់ស្គាល់ពីព្រះយេស៊ូឱ្យចូលរួមជាមួយគ្នានៅតាមព្រះសហគមន៍របស់ពួកគាត់។
កុមារា សុខ រតនពង្ស មកពីព្រះវិហារគីឡូម៉ែត្រលេខ១១ និយាយថា នេះជាលើកទី២ដែលគាត់បានចូលរួមបោះជំរំនេះ។ រតនពង្សបន្តថា កាលពីដំបូងគាត់មានអារម្មណ៍ខ្លាចគេ ប៉ុន្តែក្រោយមកគាត់មានមិត្តច្រើន ធ្វើឲ្យគាត់មានភាពក្លាហានជាងមុន និងធ្វើឱ្យគាត់សប្បាយចិត្ត។
កុមារា រូបនេះបន្ថែមថា «នៅពេលខ្ញុំត្រលប់ទៅវិញ ខ្ញុំធ្វើរឿងល្អជាមួយអ្នកជុំវិញ ដូចជាឃើញគេបាត់អីត្រូវជួយរកគេ ពេលឃើញគេមានរឿងអីខ្ញុំត្រូវមកសួរនិងជួយគេ។»
ក្នុងវ័យ១៥ឆ្នាំកុមារី ធូ ទ្រី រៀបរាប់ថា ក្នុងនាមជាកូនគ្រីស្តបរិស័ទជាកុមាររបស់ព្រះសហគមន៍ កម្មវិធីបោះជំរំនេះបានជួយឱ្យយើងចេះរួបរួមគ្នា ចេះស្រឡាញ់មិត្តភក្តិ។ ធូ ទ្រីបន្ថែមថា ក្រោយពីបញ្ចប់កម្មវិធីនេះ «ខ្ញុំនឹងទៅជួយដល់កុមារនៅព្រះសហគមន៍របស់ខ្ញុំ ឱ្យចេះជួយគ្នា រួបរួមគ្នា៕»
ដោយដាលីស
