គ្រីស្តបរិស័ទនិងពុទ្ធបរិស័ទ បាននាំយកម្ហូបអាហារមកព្រះវិហារសន្តយ៉ូសែបជុំគិរី ដើម្បីរៀបចំពិធីបុណ្យរំលឹកដល់មរណបុគ្គល ក្នុងឱកាសបុណ្យភ្ជុំបិណ្ឌប្រពៃជាតិខ្មែរ ដែលតែងតែប្រារព្ធឡើងជារៀងរាល់ឆ្នាំ ក្រោមអធិបតីភាពលោកបូជាចារ្យ ជីអូវ៉ាន់នី ទូនេឡូ និងលោកបូជាចារ្យ ផ្រុមផុង ស៊ីហារ៉ាត់ (ប៊ឺត) រួមជាមួយបងប្អូនគ្រីស្តបរិស័ទនិងពុទ្ធបរិស័ទចូលរួមយ៉ាងច្រើនកុះករ កាលពីថ្ងៃអាទិត្យ ទី២៥ ខែកញ្ញា ឆ្នាំ២០២២ កន្លងទៅនេះ ។
លោកបូជាចារ្យ ជីអូវ៉ាន់នី មានប្រសាសន៍នៅក្នុងធម្មទេសនាថា ពិធីបុណ្យភ្ជុំបិណ្ឌជាពិធីបុណ្យប្រពៃណីខ្មែរ ប៉ុន្តែដោយឡែកព្រះសហគមន៍កាតូលិករបស់យើងក៏បានថ្វាយអភិបូជានៅថ្ងៃនេះ ដើម្បីរួមគ្នាអធិដ្ឋានិងរំលឹកដល់វិញ្ញាណក្ខន្ធដែលបានស្លាប់ទៅ ព្រោះនៅក្នុងព្រះសហគមន៍កាតូលិកក៏មានពិធីបុណ្យមួយដែលហៅថា បុណ្យរំលឹកដល់មរណបុគ្គលផងដែរ។
នៅក្នុងឆ្នាំ១៩៧០ បុរីវ៉ាទីកង់បានអនុញ្ញាតឲ្យព្រះសហគមន៍កាតូលិកប្រារព្ធពិធីបុណ្យមរណបុគ្គលនៅថ្ងៃបុណ្យភ្ជុំបិណ្ឌប្រពៃណីជាតិខ្មែរ ព្រោះបុណ្យនេះមានអត្ថន័យដូចគ្នានឹងពិធីបុណ្យរបស់ព្រះសហគមន៍។ នេះបើយោងតាមសៀវភៅកត់ត្រាThe Rice Paddyរបស់លោកបូជាចារ្យហ្រ្វង់ស្វ័រ ប៉ុងសូដ៍។
លោកបូជាចារ្យជីអូវ៉ាន់នី បន្ថែមថា ការធ្វើបុណ្យមិនសំដៅទៅលើសាសនាណាទេ មិនថាសាសនាគ្រីស្ត ឬពុទ្ធសាសនានោះទេ អោយតែយើងមានចិត្តចង់ធ្វើនិងថ្វាយកិច្ចការទាំងនោះទៅព្រះជាម្ចាស់។
ពាក់អាវសជាមួយនិងខោពណ៌ទឹកប៊ិច ដៃកាន់ចានស្រាក់ មានអាយុ ២៧ឆ្នាំជាពុទ្ធបរិស័ទ លោក ឡុង ចាន់ដារ៉ា មកចូលរួមថ្វាយអភិបូជាជាមួយបងប្អូនគ្រីស្តបរិស័ទ បាននិយាយថា ទោះបីជាលោកមិនមែនជាគ្រីស្តបរិស័ទ ប៉ុន្តែលោកជឿថាការធ្វើបុណ្យគឺត្រូវធ្វើដោយចិត្តនិងសទ្ធា ហើយកុសលនេះ នឹងទៅដល់អ្នកស្លាប់ដូចគ្នា។
ក្នុងពិធីនេះ លោកដារ៉ាបានយកបាយសម្លមកចូលរួមជាមួយគ្រីស្តបរិស័ទ ដោយចង់ដឹងថា ការប្រារព្ធបុណ្យភ្ជុំរបស់គ្រីស្តសាសនាមានលក្ខណៈបែបណា។
លោកបន្ថែមថា «ខ្ញុំមានអារម្មណ៍ថា ប្លែកម៉្យាងហើយគិតថាបងប្អូនគ្រីស្តបរិស័ទមានចិត្តស្រលាញ់និងយកចិត្តទុកដាក់ជាមួយមនុស្សជុំវិញខ្លួនជាពិសេសគឺការចែកទានដល់លោកតាលោកយាយចាស់ជរាហើយមានការហូបអាហារជុំគ្នាទៀត ធ្វើអោយខ្ញុំមានអារម្មណ៍ថាកក់ក្ដៅ។»
ទន្ទឹមនឹងនោះអ្នកស្រី សយ នី ជាគ្រីស្តបរិស័ទនិយាយថា នៅថ្ងៃនេះ ខ្ញុំពិតជាមានអំណរសប្បាយណាស់ដែលព្រះសហគមន៍យើងបានជួបជុំគ្នាប្រារព្ធពិធីបុណ្យភ្ជុំបិណ្ឌដែលយើងខកខានជួបជុំគ្នាអស់រយៈពេលយូរដោយសារតែបញ្ហាជំងឺរាតត្បាតកូវីដ១៩ ប៉ុន្តែនៅឆ្នាំនេះគឺយើងបានជុំគ្នាដោយមានបងប្អូនគ្រីស្តបរិស័ទនិងបងប្អូនពុទ្ធបរិស័ទចូលរួមយ៉ាងច្រើនកុះករ។
អ្នកស្រីបន្ថែមថា ការចូលរួមរបស់ពួកគាត់បានបង្ហាញអោយឃើញថា ព្រះសហគមន៍កំពុងតែប្រកាសដំណឹងល្អទៅកាន់បងប្អូនដែលមិនទាន់ស្គាល់ព្រះជាម្ចាស់ ជារបៀបមួយដែលបង្ហាញពីអន្តរសាសនា ការស្រលាញ់គ្នាដោយមិនប្រកាន់សាសនា និងការធ្វើបុណ្យដោយមិនគិតទៅលើព្រះរូបណានោះទេ។
ស្ត្រីវ័យ៤៥ឆ្នាំរូបនេះបានបន្តថា សូមអោយអ្វីៗដែលមាននៅក្នុងថ្ងៃនេះ ក្លាយជារបៀបមួយដែលបង្ហាញពីសេចក្ដីស្រលាញ់របស់ព្រះជាម្ចាស់ បង្ហាញពីធម៌មេត្តាករុណាដែលគាប់ព្រះហឫទ័យរបស់ទ្រង់ ហើយសូមអោយកិច្ចការដែលគ្រីស្តបរិស័ទម្នាក់ៗបានប្រព្រឹត្តក្លាយទៅជាធ្លុងតែមួយ ទៅជាគម្រូល្អដល់អ្នកជំនាន់ក្រោយ។
ក្រោយអភិបូជាបានបញ្ចប់ គ្រីស្តបរិស័ទបានចែកទានដល់ ដល់ចាស់ជរា ចំនួន៣៥នាក់ ដែលមានគ្រឿងឧបភោគបរិភោគនិងសំភារៈប្រើប្រាស់មួយចំនួន។ បន្ទាប់មកបានអញ្ជើញពួកគាត់ចូលរួមបរិភោគអាហារសាមគ្គីជាមួយគ្នា។
ព្រះសហគមន៍សន្តយ៉ូសែប ជុំគិរី ស្ថិតនៅភូមិតារាជ ឃុំត្រពាំងរាំង ស្រុកជុំគិរី ខេត្តកំពត ជាព្រះសហគមន៍មួយនៅក្នុងមណ្ឌលសកម្មភាពកំពតក្នុងភូមិភាគភ្នំពេញ ដែលមានគ្រីស្តបរិស័ទ ប្រមាណជា២០០ទៅ៣០០នាក់៕
ដោយចាន់ម៉ានុត
