នៅក្នុងជំនួបគ្រូអប់រំជំនឿជាង៤០នាក់ នៅព្រះវិហារសន្តហ្រ្វង់ស្វ័រសាវីយ៉េ (ចំប៉ា) ក្នុងស្រុកកៀនស្វាយ ខេត្តកណ្ដាល លោកអភិបាលព្រះសហគមន៍ភូមិភាគភ្នំពេញ អូលីវីយ៉ ជ្មីតហស្លេបានណែនាំ និងស្នើឱ្យគ្រូអប់រំជំនឿទាំងអស់ រួមជាមួយក្រុមលោកបូជាចារ្យ បព្វជិត បព្វជិតា ធ្វើយ៉ាងណាជួយណែនាំឱ្យអ្នកឈ្វេងយល់ចូលនៅក្នុងបរិស្ថានព្រះជាម្ចាស់។
លោកអភិបាលមានប្រសាសន៍នាព្រឹកថ្ងៃទី១៤ ខែតុលាថា «គ្រូអប់រំជំនឿត្រូវបង្កើតបរិស្ថានឱ្យក្មេងៗ ចូលទៅក្នុងបរិស្ថានព្រះជាម្ចាស់ គឺជាបរិស្ថានរបស់ព្រះសហគមន៍ ចូលទៅក្នុងទំនាក់ទំនងជាមួយព្រះជាម្ចាស់»។
លោកបញ្ជាក់ថា បរិស្ថានព្រះជាម្ចាស់ គឺចូលរួមគ្រប់សកម្មភាពរបស់ព្រះសហគមន៍ ទាំងការអធិដ្ឋាន អភិបូជា និងសកម្មភាពនានារបស់ព្រះសហគមន៍ ដើម្បីមានទំនាក់ទំនងជាមួយគ្រីស្តបរិស័ទដទៃទៀតនិងព្រះជាម្ចាស់។
ក្នុងនាមជាគ្រូអប់រំជំនឿម្នាក់ «យើងត្រូវរៀបចំគម្រោងធ្វើយ៉ាងណាដើម្បីឱ្យក្មេងៗស្គាល់ព្រះជាម្ចាស់»។ នេះជាការលើកឡើងរបស់កញ្ញា វណ្ណី ឆៃអេង អាយុ២៦ឆ្នាំ ជាគ្រូអប់រំជំនឿមកពីព្រះសហគមន៍ទួលក្រសាំង ក្នុងមណ្ឌលសកម្មភាពបាសាក់។
ឆៃអេងបញ្ជាក់ថា ការបង្រៀនគឺត្រូវបង្កើតបរិយាកាសឱ្យពួកគេសប្បាយរីករាយ ចេះរួបរួមគ្នា និងចូលរួមជាមួយគ្នារាល់សកម្មភាពព្រះសហគមន៍ ដើម្បីឱ្យគេយល់ ឱ្យគេស្គាល់និងស្រឡាញ់ព្រះជាម្ចាស់ និងបង្កើតជាសំណួរនិងល្បែងផ្សេងៗ ដើម្បីឱ្យពួកគេចាប់អារម្មណ៍។
កញ្ញា វង្ស បុប្ផា អាយុ២៣ ជាអ្នកណែនាំជំនឿម្នាក់ទៀត នៅព្រះវិហារសន្តហ្រ្វង់ស្វ័រសាវីយ៉េ(ចំប៉ា)នៃមណ្ឌលសកម្មភាពមេគង្គ និយាយថា អ្នកណែនាំជំនឿត្រូវធ្វើជាគំរូដល់អ្នកឈ្វេងយល់។ កញ្ញាបុប្ផាបញ្ជាក់ថា សកម្មភាពរស់នៅប្រចាំថ្ងៃដែលគ្រូអប់រំជំនឿធ្វើ គឺត្រូវប្រកបដោយសេចក្ដីស្រឡាញ់ និងអំណរសប្បាយ ដែលជាសញ្ញាសម្គាល់របស់ព្រះជាម្ចាស់។
បុប្ផាបន្ថែមថា ដើម្បីណែនាំអ្នកទទួលអប់រំជំនឿមានទំនាក់ទំនងជិតស្និទ្ធជាមួយព្រះជាម្ចាស់ យើងត្រូវនាំគាត់អធិដ្ឋាន។
លោក ស្រ៊ីប្រាម៉ុង វីរជ័យ បូជាចារ្យទទួលខុសត្រូវមណ្ឌលសកម្មភាពទន្លេមេគង្គ មានប្រសាសន៍ថា ការបង្រៀនអប់រំជំនឿពេលបច្ចុប្បន្នបានកែប្រែច្រើន ដោយសម្របតាមគរុកោសល្យក្នុងព្រះសហគមន៍នៅកម្ពុជា។
គណៈកម្មការអប់រំជំនឿរបស់ព្រះសហគមន៍បានជំរុញឲ្យប្រើប្រាស់សៀវភៅអប់រំជំនឿចំនួន៣ដែលសំខាន់ៗ សម្រាប់ណែនាំក្នុងជីវិតរបស់នៅរបស់អ្នកឈ្វេងយល់ គឺមាន ខ្ញុំជាផ្លូវ ខ្ញុំជាសេចក្តីពិត និងខ្ញុំជាជីវិត។
លោកបូជាចារ្យវីរជ័យ បន្ថែមថា «ដោយពួកគេចេះទាំងភាសាខ្មែរនិងវៀតណាម ងាយនឹងអប់រំកូនចៅរបស់យើងតាមរបៀបព្រះសហគន៍នៅប្រទេសកម្ពុជា ដែលជាក្ដីសង្ឃឹមរបស់យើងជាអ្នកដឹកនាំមណ្ឌលសកម្មភាពមេគង្គនិងបាសាក់ឱ្យចូលក្នុងបរិស្ថានព្រះជាម្ចាស់»។
គ្រូអប់រំជំនឿទាំងអស់មកពី មណ្ឌលសកម្មភាពទន្លេមេគង្គ និងមណ្ឌលសកម្មភាពទន្លេបាសាក់ ដែលភាគច្រើនជាសហគមន៍វៀតណាមរស់នៅប្រទេសកម្ពុជា។
លោកបូជាចារ្យបន្ថែមថា ក្នុងតំបន់ទាំងពីរនេះ មានគ្រូអប់រំជំនឿជាយុវជនជាច្រើនជាកម្លាំង ដែលបូជាចារ្យត្រូវចាប់អារម្មណ៍ ទទួលគំនិត ជួយលើកទឹកចិត្ត អប់រំ និងស្ដាប់តម្រូវការរបស់ពួកគេ ដើម្បីឱ្យការអប់រំទាន់សម័យ និងធ្វើឱ្យព្រះសហគមន៍រីកចម្រើន ហើយគ្រូអប់រំជំនឿត្រូវប្រជុំយ៉ាងតិចមួយខែម្ដង។
ក្នុងរយៈពេលកន្លះថ្ងៃនេះ គ្រូអប់រំជំនឿទាំងអស់បានចែករំលែកបទពិសោធ និងស្តាប់ពីចំណុចខ្សោយនិងចំណុចខ្លាំងនៃព្រះសហគមន៍នីមួយៗក្នុងការអប់រំជំនឿ ដើម្បីយកទៅរិះគិតនិងអនុវត្តនាពេលខាងមុខ។
មុនពេលបញ្ចប់កម្មវិធី លោកអភិបាលអូលីវីយ៉េ បានឲ្យគ្រូអប់រំជំនឿទាំង៤០នាក់ ប្រកាសពាក្យសន្យាជាគ្រូអប់រំជំនឿសម្រាប់ឆ្នាំសិក្សា២០២២-២០២៣ ដោយឱនកាយនៅចំពោះព្រះភ័ក្រ្តព្រះជាម្ចាស់ និងសូមព្រះជាម្ចាស់ប្រទានព្រះវិញ្ញាណដ៏វិសុទ្ធដឹកនាំគ្រូអប់រំជំនឿ និងចេះណែនាំអ្នកឈ្វេងយល់ជំនឿ ឱ្យស្រឡាញ់ព្រះសហគមន៍ និងស្រឡាញ់ព្រះជាម្ចាស់៕
ដោយដាលីស
