លោកគ្រូអ្នកគ្រូដែលជាអ្នកណែនាំអប់រំជំនឿទាំងបីភូមិភាគចំនួន១៤០នាក់ ចូលរួមសិក្ខាសាលាអប់រំជំនឿនៅមណ្ឌលសកម្មភាពភ្នំពេញថ្មី រយៈពេល២ថ្ងៃ កាលពីថ្ងៃទី១១ ខែតុលា ដល់ថ្ងៃទី១២ ខែតុលា ឆ្នាំ២០២២ ក្រោមប្រធានបទ៖ «សូមអញ្ជើញមក អ្នកនឹងបានឃើញ» ដើម្បីទទួលបានបទពិសោធបន្ថែមទៅលើគន្លឹះនិងគរុកោសល្យថ្មីនៅក្នុងការបញ្ជូនជំនឿបន្តដល់បងប្អូនដែលកំពុងឈ្វេងយល់ពីព្រះជាម្ចាស់។
លោកអភិបាល អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញមានប្រសាសន៍ថា គ្រូអប់រំជំនឿណែនាំអ្នកឈ្វេងយល់ឲ្យស្គាល់ព្រះជាម្ចាស់ ស្គាល់ពីព្រះសហគមន៍ ស្គាល់អំពីលទ្ធិព្រះសហគមន៍។ លោកបន្តថា អ្នកឈ្វេងយល់ព្រះបន្ទូលរបស់ព្រះជាម្ចាស់ ចង់ចូលយ៉ាងជ្រៅទៅក្នុងព្រះបន្ទូល ក្នុងជីវិតនៃព្រះសហគមន៍ និងក្នុងទំនាក់ទំនងជាមួយព្រះជាម្ចាស់ ។
លោកអភិបាលបន្ថែមថា «ដូច្នេះពិតមែនគ្រូអប់រំជំនឿត្រូវមានបេសកកម្មមួយយ៉ាងពិសេសបំផុតនៅក្នុងព្រះសហគមន៍ ដើម្បីបន្តជំនឿដែលបានទទួលពីក្រុមគ្រីស្តទូត ពីព្រះសហគមន៍ផ្ទាល់ ឲ្យចូលទៅក្នុងជីវិត នៅក្នុងដួងចិត្ត នៅក្នុងវិញ្ញាណរបស់អ្នកដែលកំពុងស្វែងរក»។
ជាមួយគ្នានេះដែរ លោកបូជាចារ្យទទួលបន្ទុកអប់រំជំនឿអន្តរភូមិភាគ ហ្វ្រង់ស្វ័រ ហ្សេមេដាល មានប្រសាសន៍ថា ជារៀងរាល់ឆ្នាំសន្តអ៊ីរេណេ តែងតែធ្វើសិក្ខាសាលាសម្រាប់គ្រូអប់រំជំនឿអន្តរភូមិភាគ ដើម្បីជួយណែនាំលើកទឹកចិត្តអ្នកអប់រំជំនឿឱ្យបន្តមុខងាររបស់ពួកគាត់ដោយជួយបញ្ចូលចំណេះដឹងខ្លះៗអំពីគរុកោសល្យ។
លោកថាអ្នកណែនាំជំនឿមានសារៈសំខាន់ ព្រោះមានតួនាទីសំខាន់ដើម្បីជួយអ្នកស្វែងរកព្រះជាម្ចាស់ឱ្យស្រឡាញ់ព្រះអង្គ ឱ្យស្គាល់ខ្លួនឯងជាបុត្រធីតារបស់ព្រះជាម្ចាស់។
លោកបន្ថែមថា ដើម្បីក្លាយជាគ្រូអប់រំជំនឿ យើងត្រូវមានជំនឿ មានបទពិសោធអំពីព្រះជាម្ចាស់ដែលមានវត្តមានគង់នៅជាមួយយើង ចូលរួមយ៉ាងសកម្មនៅក្នុងព្រះសហគមន៍ ត្រូវមានចំណេះដឹងសមរម្យដើម្បីជួយណែនាំគេ។ មានន័យថាត្រូវមានជំនឿ ចំណេះដឹងចេះប្រើប្រាស់សៀវភៅអប់រំជំនឿ និងប្រព្រឹត្តកិច្ចការជាគំរូ។
នៅក្នុងកម្មវិធីសិក្ខាសាលារយៈពេល២ថ្ងៃនេះអ្នកគ្រូ កាំង សុធី ជាគ្រូអប់រំជំនឿ នៅព្រះវិហារសន្តសិលានិងសន្តប៉ូល ភ្នំពេញថ្មី បាននិយាយថា នេះគឺជាលើកទីមួយដែលគាត់បានចូលរួមសិក្ខាសាលាអប់រំជំនឿអន្តរភូមិភាគនេះ។
អ្នកគ្រូបានបន្ថែមថា ការអប់រំជំនឿត្រូវការមានឯកសារជំនួយ។ Appដែលមណ្ឌលអប់រំជំនឿសន្តអ៊ីរេណេបានបង្កើតឡើងជួយផ្ដល់ចំណេះដឹងថ្មីៗដល់ការអប់រំជំនឿរបស់គាត់។
អ្នកគ្រូកាំង សុធី បានបន្តទៀតថា ព្រះសហគមន៍មួយកាលណាបើគ្មានគ្រូអប់រំជំនឿទេ ព្រះសហគមន៍នឹងមិនរីកចម្រើនទេ។ «ព្រះសហគមន៍នឹងប្រាកដជាស្លាប់បើសិនជាអត់មានគ្រូអប់រំជំនឿក្នុ្ងងការចែកជំនឿបន្ត»។
អ្នកគ្រូបន្ថែមថា គ្រីស្តបរិស័ទម្នាក់គ្រាន់តែមកព្រះវិហាររាល់ថ្ងៃអាទិត្យមិនទាន់គ្រប់គ្រាន់នោះទេ គឺត្រូវតែចែករំលែកជំនឿ សេចក្ដីស្រលាញ់ និងសេចក្ដីសង្ឃឹមរបស់ព្រះជាម្ចាស់ទៅអ្នកដទៃឱ្យស្គាល់ដូចយើង ។
ជាមួយគ្នានេះដែរ លោក ធឹម ស៊ីធីម ជាគ្រូអប់រំជំនឿមនុស្សពេញវ័យ មកពីព្រះសហគមន៍សន្តយ៉ូហានសៀមរាប បាននិយាយថា សិក្ខាសាលានេះបានបង្ហាញពីបច្ចេកទេស បង្រៀនអប់រំជំនឿ និងគំនិតថ្មីៗដើម្បីយកទៅអនុវត្តនៅតាមព្រះសហគមន៍នីមួយៗ។
លោកគ្រូស៊ីធីម បន្តថា ពេលត្រឡប់ទៅព្រះសហគមន៍សៀមរាបវិញ លោកនឹង រៀបចំការបង្រៀនអប់រំជំនឿបន្ថែមសម្រាប់គ្រូអប់រំជំនឿ ដោយធ្វើបទបង្ហាញឬ ពន្យល់អំពីគរុកោសល្យបន្ថែមទៀតដល់ពួកគាត់។ គ្រូអប់រំជំនឿត្រូវធ្វើជាគំរូទើបមានអ្នកឈ្វេងយល់កាន់តែច្រើន ហើយពួកគេនឹងមានជំនឿ មានសេចក្ដីស្រលាញ់ និងបានឃើញអំពីការត្រាស់ហៅរបស់ព្រះជាម្ចាស់សម្រាប់ពួកគាត់ម្នាក់ៗ ។
លោក សុខ ហេង ជាគ្រូអប់រំជំនឿមកពីព្រះវិហារសន្តីម៉ារីម៉ាដាឡា ប៉ោយប៉ែត នៃភូមិភាគបាត់ដំបង បាននិយាយថា ការបញ្ជូនបន្តជំនឿជាតួនាទីនិងគោលបំណងរបស់គ្រូអប់រំជំនឿ។ លោកបន្ថែមថា « យើងមិនមែននិយាយពីខ្លួនយើងជាគ្រូអប់រំជំនឿ ប៉ុន្តែយើងនិយាយអំពីវត្តមានរបស់ព្រះយេស៊ូគ្រីស្ត ដើម្បីអោយក្មេងៗឬយុវជនដែលស្វែងរកវត្តមានរបស់ព្រះអង្គ យល់កាន់តែច្បាស់អំពីព្រះអង្គ» ដើម្បីអោយព្រះបន្ទូលជ្រាបចូលទៅក្នុងជីវិតរស់នៅប្រចាំថ្ងៃរបស់គាត់។
ដូនជី ស្រី សុជាតិក្នុងក្រុមគ្រួសារស្រលាញ់ឈើឆ្កាងព្រះយេស៊ូ និងជាគ្រូឧទ្ទេសធ្វើបទបង្ហាញអំពីរបៀបបង្រៀនអប់រំជំនឿ បានពន្យល់ថា អ្នកអប់រំជំនឿមានគោលដៅណែនាំអ្នកស្វែងរកអោយស្គាល់សេចក្ដីស្រលាញ់និងមានទំនាក់ទំនងយ៉ាងស្និទ្ធស្នាលជាមួយព្រះគ្រីស្ត ។ ដូនជីរូបនេះបន្ថែមទៀតថា អ្នកអប់រំជំនឿត្រូវតែជួយអ្នកស្វែងរក ដែលបានចាប់ផ្ដើមកែប្រែចិត្តគំនិត អោយផ្ញើជីវិតទាំងស្រុងទៅលើព្រះយេស៊ូគ្រីស្ត ពោលគឺជឿទុកចិត្តលើព្រះអង្គក្នុងគ្រប់កាលៈទេសៈ ។ អ្នកអប់រំជំនឿត្រូវតែជួយអ្នកស្វែងរកអោយប្រកាសជំនឿត្រឹមត្រូវរបស់ព្រះសហគមន៍ តាមពាក្យសម្ដី និងតាមរបៀបរស់នៅ៕
ក្នុងនាមគ្រូអប់រំជំនឿ បងស្រី ខឹម សុខា មកពីព្រះសហគមន៍ភូមិភាគកំពង់ចាម បាននិយាយថា «តួនាទីគ្រូអប់រំជំនឿ ត្រូវមានទំនួលខុសត្រូវលើកិច្ចការដែលខ្លួនធ្វើ»។ បងស្រីបញ្ជាក់ទៀតថា អ្នកណែនាំជំនឿ ត្រូវធ្វើជាគំរូល្អៗដល់អ្នកឈ្វេងយល់ឱ្យមើលឃើញអ្នកណែនាំដ៏ពិតប្រាកដ។ អ្នកណែនាំគេមិនចេះតែនិយាយ ប៉ុន្តែត្រូវមានភស្តុតាង ឯកសារគ្រប់គ្រាន់ដូចជា លទ្ធិនៃគ្រីស្តសាសនា ដើម្បីបញ្ជ្រាប និងពន្យល់ឱ្យគេយល់ ព្រមទាំងស្គាល់ព្រះគម្ពីរឱ្យបានច្បាស់លាស់អំពីព្រះយេស៊ូ។ បងស្រីបន្តទៀតថា អ្នកណែនាំត្រូវមានគរុកោសល្យ ដោយរៀបចំមេរៀន ចម្រៀង និងល្បែងឱ្យបានត្រឹមត្រូវតាមលំដាប់លំដោយ។
«ការណែនាំជំនឿពិតជាមានសារៈប្រយោជន៍ខ្លាំងណាស់សម្រាប់គ្រីស្តបរិស័ទ ដោយគ្រីស្តទូតបានបញ្ជូនបន្តជំនឿមកយើងរហូតដល់សព្វថ្ងៃនេះ និងប្រសិនបើយើងមិនបានបញ្ជូនបន្តជំនឿទៅឱ្យអស់បងប្អូនដែលមិនបានស្គាល់ព្រះយេស៊ូទេ យើងប្រៀបបីដូចអំបិលដែលគ្មានជាតិប្រៃ» អ្នកណែនាំជំនឿ សុខាបញ្ជាក់។ អ្នកគ្រូសុខា បន្យល់ថា យើងត្រូវបន្តជំនឿដល់អស់បងប្អូនទាំងអស់ឱ្យស្គាល់ព្រះយេស៊ូដូចយើងបានស្គាល់ដែរ ហើយពេលណែនាំជំនឿគេ គឺប្រៀបដូចបានណែនាំជំនឿដល់ខ្លួនឯងដែរតាមរយៈមេរៀនទាំងនោះ និងធ្វើឱ្យជំនឿរឹងមាំ និងទុកចិត្តលើព្រះជាម្ចាស់ពិតប្រាកដ។
ការបញ្ជូនបន្តជំនឿនេះ បងស្រីសុខា និយាយថាសារៈសំខាន់ដល់សង្គមទាំងមូល ព្រោះមនុស្សក្នុងសង្គមនឹងយល់ថាអ្វីៗទាំងអស់ជាស្នាព្រះហស្តព្រះជាម្ចាស់ និងមនុស្សទាំងអស់ជាតំណាងព្រះជាម្ចាស់ មានតម្លៃនិងសិទ្ធិស្មើគ្នា គឺមានតែសេចក្ដីស្រឡាញ់។
ទាក់ទងទៅនឹងតួនាទីអ្នកណែនាំជំនឿនេះ លោកលេង ហុង និយាយដូចគ្នានឹងគ្រូអប់ជំនឿខាងលើ ប៉ុន្តែលោកបន្ថែមថា គ្រូអប់រំជំនឿត្រូវការរស់នៅក្នុងជីវិតគំរូ និងរួមសុខរួមទុក្ខជាមួយបងប្អូនឯទៀតៗ។ គ្រូងប់រំជំនឿមិនមែនយកចំណេះទៅបង្រៀនគេ ប៉ុន្តែត្រូវការយកជីវិតខាងផ្លូវវិញ្ញាណដោយណែនាំឱ្យគេចេះអធិដ្ឋាន ចេះស្រឡាញ់អ្នកដទៃ និងអ្វីដែលសំខាន់គឺត្រូវ តាមថែរក្សានៅជិតជាមួយអ្នកឈ្វេងយល់ជំនឿ ឱ្យគាត់បាត់ភាពកក់ក្ដៅ។
តាមរយៈបទពិសោធ២០ឆ្នាំជាគ្រូអប់រំជំនឿនេះ លោក ហុងយល់ថាជីវិតរបស់លោកមានតម្លៃ ដោយព្រះជាម្ចាស់បានជ្រើសរើសលោកឱ្យធ្វើជាអ្នកបម្រើខ្ពស់មុខខ្ពស់មាត់(គ្រូអប់រំជំនឿ) ទោះបីជាលោកគ្មានឋានៈនៅក្នុងសង្គមក៏ដោយ។ លោកហុងបន្តថា ព្រះជាម្ចាស់តែងតែនៅជិតលោកនិងផ្ដល់កម្លាំងឱ្យបន្តដំណើរជាមួយព្រះអង្គ តាមរយៈការធ្វើជាស្ពានសម្រាប់បងប្អូនក្នុងជំនឿ ដែលជាហេតុធ្វើឱ្យលោកមានអំណរសប្បាយដោយធ្វើឱ្យជីវិតមិនពឹងផ្អែកលើរឿងលោកីយ៍ច្រើនពេកទេ។
ក្នុងអំឡុពេលនៃសិក្ខាសាលានេះ គ្រូអប់រំជំនឿជាង១០០នាក់បានឈ្វេងយល់ពីតួនាទីអ្នកណែនាំជំនឿ គរុកោសល្យនៃការអប់រំជំនឿ និងលក្ខណៈសម្បត្តិនៃអ្នកឈ្វេងយល់ដើម្បីក្លាយជាគ្រីស្តបរិស័ទ៕
ដោយដាលីសនិងម៉ានុត
More Photos: https://catholiccambodia.org/?p=28207
