អភិបូជាគោរពព្រះនាងម៉ារីជាមាតារបស់ព្រះជាម្ចាស់
និងគោរពវិញ្ញាណក្ខន្ធរបស់សម្តេចប៉ាប បេណេឌិកតូ ទី១៦
នៅព្រះសហគមន៍ក្សត្រីនៃសន្តិភាព អរិយក្សត្រ
ភ្នំពេញខាងជើង ថ្ងៃទី២ ខែមករា ឆ្នាំ២០២៣
បងប្អូនជាទីស្រឡាញ់
ថ្ងៃនេះ ជាពេលវេលាមួយដែលយើងត្រូវការស្តាប់សំលេងរបស់សម្តេចប៉ាប បេណេឌិកតូ ទី១៦ ដែលបានជូនដល់ព្រះសហគមន៍នៅប្រទេសកម្ពុជា កាលពីដើមខែមករា ឆ្នាំ២០១៣ នៅក្នុងសារវីដេអូ ដែលព្រះអង្គបានផ្ញើដល់យើង។ នៅចុងបញ្ចប់នៃសារវីដេអូ សម្តេចប៉ាបទ្រង់មានព្រះបន្ទូលថា “សូមព្រះនាងម៉ារី ដែលជាព្រះមហាក្សត្រីនៃទន្លេមេគង្គ នៅក្នុងកាយវិការដ៏សុភាពរាបសារនិងភក្តីភាពចំពោះព្រះជាម្ចាស់ បំភ្លឺជីវិតរបស់យើងនៅក្នុងឆ្នាំនៃជំនឿ”។
ពិតមែន ថ្ងៃនេះយើងជួបជុំគ្នាដើម្បីអរព្រះគុណព្រះជាម្ចាស់ សម្រាប់ជីវិតដែលមានផ្លែយ៉ាងច្រើនរបស់សម្តេចប៉ាបដ៏ជាទីគោរពស្រឡាញ់របស់យើង គឺសម្តេចប៉ាប បេណេឌិកតូ ទី១៦។ ជាពេលវេលាសម្រាប់យើង ដែលជាព្រះសហគមន៍កាតូលិកនៅប្រទេសកម្ពុជា ដើម្បីទូលអង្វរព្រះជាម្ចាស់ សូមព្រះអង្គទទួលវិញ្ញាណក្ខន្ធរបស់សម្តេចប៉ាប នៅក្នុងព្រះរាជនៃព្រះពន្លឺរបស់ព្រះជាម្ចាស់។ សម្តេចប៉ាប បេណេឌិកតូ ទី១៦ បានសោយទិវង្គតនៅថ្ងៃទី៣១ ខែធ្នូ ឆ្នាំ២០២២ គឺមួយថ្ងៃមុនព្រះសហគមន៍គោរពព្រះនាងម៉ារីជាព្រះមាតារបស់ព្រះជាម្ចាស់។
តាមពិត ព្រះនាងម៉ារីបានទៅជាគំរូរបស់លោកឪពុក យ៉ូសែប អាឡូស៊ីស រ៉ាតហ្ស៊ីង័រ (Joseph Aloisius Ratzinger) ដែលជាទស្សនៈទូត ដែលជាបូជាចារ្យ ដែលជាលោកអភិបាល រហូតក្លាយទៅជាគ្រូគង្វាលសម្រាប់ព្រះសហគមន៍ទាំងមូល ដោយមានព្រះនាមថ្មី គឺសម្តេចប៉ាប បេណេឌិកតូ ទី១៦ (Pope Benedict XVI)។ យ៉ូសែប រ៉ាតហ្ស៊ីង័រ បានកើតនៅថ្ងៃទី១៦ ខែមេសា ឆ្នាំ១៩២៧ ដូច្នេះសូមបងប្អូនចាប់អារម្មណ៍ យើងបានរកឃើញរូបសំណាកព្រះនាងម៉ារីនៃទីក្រុងលួដ៍ ដែលយើងមាននៅអរិយក្សត្រនេះដោយអ្នកនេសាទជនជាតិអ៊ីស្លាមម្នាក់ នៅថ្ងៃទី១៦ ខែមេសា ឆ្នាំ២០០៨ គឺសម្របពេលដែលសម្តេចប៉ាប បេណេឌិកតូ ទី១៦ ប្រារព្ធខួបកំណើតគម្រប់៨១ព្រះវស្សា។ ខ្ញុំគិតថា នេះជាសញ្ញាមួយយ៉ាងពិសេសដែលសម្តេចប៉ាបបានប្រទានដល់ព្រះសហគមន៍យើងខ្ញុំនៅប្រទេសកម្ពុជា តាមរយៈព្រះនាងម៉ារីនិងព្រះជាម្ចាស់។
ថ្ងៃនេះ យើងខ្ញុំសូមអធិដ្ឋានអរព្រះគុណព្រះជាម្ចាស់សម្រាប់ជីវិតរបស់សម្តេចប៉ាប ព្រះអង្គបានយកចិត្តទុកដាក់យកព្រះជាម្ចាស់ជាទីពឹងតែមួយគត់។ សម្តេចប៉ាប ដែលមានព្រះប្រាជ្ញាញាណ ដែលជឿលើប្រាជ្ញាដែលណែនាំជំនឿរបស់យើង។ សម្តេចប៉ាប ជាបុរសម្នាក់ដែលស្រឡាញ់សេចក្ដីពិត។ យប់នេះ ខ្ញុំរំភើបចិត្តនៅពេលខ្ញុំនឹកឃើញអំណោយដែលសម្តេចប៉ាបបានប្រទានដល់ខ្ញុំ។ តាមពិត គឺជាសម្តេចប៉ាប បេណេឌិកតូ ទី១៦ ដែលបានតែងតាំងខ្ញុំជាលោកអភិបាល ឧបត្ថម្ភនៃព្រះសហគមន៍កាតូលិកភូមិភាគភ្នំពេញ នៅរាត្រីព្រះយេស៊ូប្រសូតថ្ងៃទី២៤ ខែធ្នូ ឆ្នាំ២០០៩ គឺជារាត្រីដែលព្រះជាម្ចាស់ដាក់ខ្លួន ដើម្បីចាប់កំណើតជាមនុស្ស។ នៅថ្ងៃទី១ ខែមេសា ឆ្នាំ២០១០ ព្រះអង្គបានតែងតាំងខ្ញុំជាលោកអភិបាលពេញសិទ្ធិ សម្រាប់ព្រះសហគមន៍កាតូលិកភូមិភាគភ្នំពេញ។ នៅថ្ងៃដែលយើងគោរពសន្តីតេរេសានៃព្រះកុមារយេស៊ូ ដែលជាឧបការិនីសម្រាប់អ្នកប្រកាសដំណឹងល្អ។ ជាពិសេស គឺជាសន្តីដែលតូចតាចមួយរូប ដោយបានលាក់ខ្លួននៅក្នុងអារាមសំងាត់។
នៅពេលព្រះអង្គបានទទួលតួនាទីជាសម្តេចប៉ាប ទ្រង់មានព្រះបន្ទូលថា “ជីវិតរបស់ខ្ញុំគឺជាជីវិតសាមញ្ញធម្មតា ដែលដាក់ខ្លួនដើម្បីទៅជាកម្មករនៅក្នុងចម្ការទំពាំងបាយជូររបស់ព្រះជាម្ចាស់”។
បងប្អូនជាទីស្រឡាញ់ សូមចាប់អារម្មណ៍អំពីរបៀបដែលសម្តេចប៉ាបបានយកចិត្តទុកដាក់ ដល់ព្រះសហគមន៍កាតូលិកកម្ពុជាដ៏តូចតាចរបស់យើង។ នៅឆ្នាំ២០១២ ពេលខ្ញុំចូលរួមនៅក្នុងមហាសន្និបាតនៅទីក្រុងរ៉ូម សម្រាប់ការប្រកាសដំណឹងល្អសាជាថ្មី។ នៅពេលសម្តេចប៉ាប បានបញ្ចប់មហាសន្និបាតនេះ ព្រះអង្គបានបញ្ចេញយោបល់ខ្លះៗដែលចេញពីដួងចិត្តរបស់សម្តេចប៉ាបតែម្តង។ ព្រះអង្គបានលើកអំពីព្រះសហគមន៍កាតូលិកនៅប្រទេសកម្ពុជា ដែលបានផ្តល់សក្ខីភាពអំពីព្រះសហគមន៍ដែលកំពុងកើតឡើងដូចនៅសម័យក្រុមគ្រីស្តទូត។ តាមពិត ព្រះអង្គបានស្តាប់និងចាប់អារម្មណ៍អំពីអ្វីដែលខ្ញុំបានចែករំលែកនៅក្នុងមហាសន្និបាតនោះ នៅក្នុងចំណោមលោកអភិបាលរាប់រយអង្គ។
ប៉ុន្មានថ្ងៃមុន ដែលព្រះអង្គសុំចូលនិវត្តន៍ឈប់តួនាទីជាសម្តេចប៉ាប ទ្រង់បានផ្ញើសារជាវីដេអូដល់ព្រះសហគមន៍កាតូលិកកម្ពុជា។ ព្រះអង្គបានផ្ញើសារវីដេអូតិចបំផុត នៅក្នុងកាលដែលព្រះអង្គកាន់តួនាទីជាសម្តេចប៉ាប។ ប៉ុន្តែ សារវីដេអូចុងក្រោយរបស់ព្រះអង្គ គឺសម្រាប់ព្រះសហគមន៍កាតូលិកកម្ពុជាយើង ព្រះអង្គបានទូលអង្វរព្រះនាងម៉ារីនៃទន្លេមេគង្គ ឱ្យការពារថែរក្សាព្រះសហគមន៍របស់យើង និងការពារថែរក្សាជំនឿរបស់យើង។
សម្តេចប៉ាបជាទីស្រឡាញ់ កាលពីថ្ងៃទី៣០ ខែធ្នូ ឆ្នាំ២០២២នេះ ខ្ញុំបានថ្វាយអភិបូជាជាមួយបងស្រីមេត្តាករុណា នៅចោមចៅ រួមជាមួយបងស្រី យ៉ូសែហ្វ ដែលជាបងស្រីប្រធានដោយបានទទួលតួនាទីពីអ្នកម្តាយតេរេសាដែរ។ នៅពេលនោះ ខ្ញុំរួមជាមួយបងស្រីក៏បានអធិដ្ឋានសម្រាប់សម្តេចប៉ាប ខ្ញុំក៏បានទូលអង្វរមិត្តសម្លាញ់ពិសេសទាំងពីររបស់សម្តេចប៉ាប ដែលសព្វថ្ងៃជាសន្តសន្តី។ គឺសម្តេចប៉ាប យ៉ូហានប៉ូល ទី២ ដែលព្រះអង្គបានស្រឡាញ់និងបម្រើអស់ពីកម្លាំងកាយកម្លាំងចិត្ត និងអ្នកម្តាយតេរេសា ដែលព្រះអង្គបានជួបយ៉ាងច្រើន។ នៅក្នុងសារលិខិតរបស់សម្ដេចប៉ាប បេណេឌិកតូ ទី១៦ ប៉ុន្មានដងបានលើកអ្នកម្តាយតេរេសាដែលជាគំរូមួយយ៉ាងពិសេស ដើម្បីឱ្យយើងមើលឃើញធម៌មេត្តាករុណារបស់ព្រះជាម្ចាស់យ៉ាងជាក់ស្តែង។ នៅពេលនោះ ខ្ញុំបានអធិដ្ឋានសុំឱ្យសន្តសន្តីទាំងពីរបើកទ្វារនៃស្ថានបរមសុខ ដើម្បីទទួលស្វាគមន៍ព្រះអង្គ។
ព្រះបន្ទូលចុងក្រោយរបស់សម្តេចប៉ាប នៅក្នុងវេលាដែលត្រូវទទួលមរណៈភាព គឺ “ឱព្រះយេស៊ូអើយ ខ្ញុំស្រឡាញ់ព្រះអង្គយ៉ាងខ្លាំង”។
ខ្ញុំគិតថា នេះជាពាក្យសង្ខេបនៃព្រះជន្មរបស់សម្តេចប៉ាបដ៏ពិតប្រាកដ។ បងប្អូនជាទីស្រឡាញ់ យប់នេះឱ្យយើងស្តាប់ម្តងទៀតអំពីការអប់រំរបស់សម្តេចប៉ាប បេណេឌិកតូ ទី១៦ ដែលបានជម្រុញយើងដើម្បីឱ្យយើងបន្តបេសកកម្មរបស់ព្រះជាម្ចាស់។ នៅក្នុងនេះមាន៥ចំណុចដ៏សំខាន់គឺ៖
ចំណុចទី១ ព្រះជាម្ចាស់ជាសេចក្តីស្រឡាញ់ នេះជាសារលិខិតដំបូងរបស់សម្តេចប៉ាបផ្ញើជូនដល់ពិភពលោក “ព្រះជាម្ចាស់ជាសេចក្តីស្រឡាញ់”។
ចំណុចទី២ ជំនឿដែលបំភ្លឺជីវិតរបស់យើង សម្តេចប៉ាបបានសរសេរសៀវភៅរាប់រយក្បាល នៅពេលព្រះអង្គធ្វើជាគ្រូបង្រៀនទេវវិទ្យា ធ្វើជាលោកអភិបាល និងធ្វើជាសម្តេចប៉ាប។ ជាពិសេស សៀវភៅមួយក្បាលដែលបានបង្ហាញអំពីជំនឿរបស់គ្រីស្តបរិស័ទម្សិលមិញ និងថ្ងៃនេះ ដែលជាពន្លឺពិសេសសម្រាប់ជំនឿរបស់យើង។
ចំណុចទី៣ សេចក្តីពិតជាផ្លូវនៃជីវិតរបស់យើង តាមពិតប្រសិនបើយើងមើលសាជាថ្មី ការសរសេរ ការអប់រំ ការណែនាំ ការបង្រៀនរបស់សម្តេចប៉ាប បេណេឌិកតូ ទី១៦ យើងមើលឃើញខ្សែដែលបានណែនាំចិត្តគំនិតនិងការអប់រំរបស់ព្រះអង្គ គឺសេចក្តីពិតជាផ្លូវនៃជីវិតរបស់យើង។
ចំណុចទី៤ មានតែព្រះយេស៊ូគ្រីស្តដែលអាចសង្រ្គោះយើង ទោះបីព្រះអង្គជាសម្តេចប៉ាប ក៏ព្រះអង្គបានរកឃើញពេលដើម្បីសរសេរសៀវភៅ៣ក្បាល សម្រាប់បង្ហាញអំពីព្រះយេស៊ូគ្រីស្តបានកើតជាមនុស្ស ជីវិតរបស់ព្រះយេស៊ូគ្រីស្ត និងព្រះយេស៊ូគ្រីស្តមានព្រះជន្មរស់ឡើងវិញ។
ចំណុចទី៥ អំណាចនៃសេចក្តីស្រឡាញ់អាចឈ្នះអំពើអាក្រក់ អំពើឃោរឃៅនៅក្នុងពិភពលោក នេះជាអ្វីដែលសម្តេចប៉ាបបានបង្ហាញនៅក្នុងសារលិខិតរបស់ព្រះអង្គ។
ពិតមែន យើងមិនអាចសង្ខេបទាំងគំនិត ទាំងជីវិត ទាំងស្នាដៃរបស់សម្តេចប៉ាប បេណេឌិកតូ ទី១៦ ដោយពាក្យខ្លីៗបានទេ។ ប៉ុន្តែ ខ្ញុំគិតថាយប់នេះឱ្យយើងស្តាប់អត្ថន័យនៃជីវិតរបស់សម្តេចប៉ាបគឺ “ប្រសិនបើយើងចង់ឱ្យពិភពលោករបស់យើងមានជីវិតសាជាថ្មី ប្រសិនបើយើងចង់ឱ្យពិភពលោករបស់យើងទទួលការសង្រ្គោះដ៏ពិតប្រាកដ មានផ្លូវតែមួយ គឺឱ្យយើងរកឃើញព្រះជាម្ចាស់សាជាថ្មី”។ មានតែព្រះជាម្ចាស់ដែលណែនាំយើងបាន យើងឃើញសព្វថ្ងៃពិភពលោកដើរឆ្ងាយពីព្រះជាម្ចាស់ ប៉ុន្តែមានតែទំនាក់ទំនងដែលយើងមានជាមួយព្រះជាម្ចាស់ ទើបអាចណែនាំឱ្យយើងរកឃើញផ្លូវនៃសុភមង្គលដ៏ពិតប្រាកដលើផែនដីនេះ ដើម្បីរៀបចំទទួលជីវិត ជីវិតអស់កល្បជានិច្ចនៅស្ថានបរមសុខបាន។
បងប្អូនជាទីស្រឡាញ់ យើងបានអបអរសាទរព្រះយេស៊ូប្រសូតថ្មីៗនេះ នៅពេលនោះយើងបានសំលឹងមើលសេចក្តីស្រឡាញ់របស់ព្រះជាម្ចាស់យ៉ាងជាក់ស្តែង នៅក្នុងរោងព្រះយេស៊ូប្រសូត។ ពិតមែន ព្រះយេស៊ូប្រសូត ជាព្រះបន្ទូលសន្យារបស់ព្រះជាម្ចាស់ដែលកើតជាមនុស្សដ៏ពិតប្រាកដ គឺយើងទទួលជីវិតអស់កល្បជានិច្ច។ កុំឱ្យយើងយល់ច្រឡំ តាមពិតអំណរសប្បាយដ៏ពិតប្រាកដ សុភមង្គលដ៏ពិតប្រាកដ មិនមែនស៊ីសងយើងជាអ្នកមានឬយើងជាអ្នកក្រីក្រ។ មិនមែនស៊ីសងលើទ្រព្យសម្បត្តិរបស់យើងលើលោកីយ៍នេះទេ សុភមង្គលដ៏ពិតប្រាកដគឺជាឥរិយាបថនៅក្នុងដួងចិត្តរបស់យើង។ ប្រសិនបើ យើងចេះទទួលស្វាគមន៍វត្តមានរបស់ព្រះជាម្ចាស់នៅក្នុងដួងចិត្តយើង ប្រសិនបើយើងចេះចែករំលែកសេចក្តីស្រឡាញ់របស់ព្រះអង្គដល់បងប្អូនឯទៀតៗ នោះយើងអាចដើរតាមផ្លូវនៃសុភមង្គលដ៏ពិតប្រាកដបាន។
ម្សិលមិញ ខ្ញុំបានទទួលសំបុត្រមួយច្បាប់ដ៏ខ្លីពីអ្នកជាប់ក្នុងមន្ទីរឃុំឃាំងម្នាក់ គាត់បានជូនពរថ្ងៃព្រះយេស៊ូប្រសូតដល់ខ្ញុំ។ គាត់បានសរសេរថា “សព្វថ្ងៃខ្ញុំពោរពេញដោយសុភមង្គល ដោយសារខ្ញុំមានទំនាក់ទំនងយ៉ាងល្អជាមួយបងប្អូនដែលជាប់ក្នុងមន្ទីរឃុំឃាំងជាមួយខ្ញុំ ដោយសារខ្ញុំមានទំនាក់ទំនងយ៉ាងល្អជាមួយអ្នកដែលការពារនិងសន្តិសុខនៅក្នុងមន្ទីរឃុំឃាំង និងដោយសាររាល់ថ្ងៃខ្ញុំបានអធិដ្ឋានផ្គាំនិងអានគម្ពីរដំណឹងល្អ”។ ខ្ញុំគិតថា នេះជាអំណោយមួយយ៉ាងពិសេស សុភមង្គលដ៏ពិតប្រាកដមកក្នុងដួងចិត្តរបស់យើង លុះត្រាតែយើងចេះស្រឡាញ់ព្រះជាម្ចាស់ និងយើងបម្រើបងប្អូនឯទៀតៗ។ នេះជាផ្លូវ ដែលសម្តេចប៉ាប បេណេឌិកតូ ទី១៦ បានណែនាំនិងជូនយើងឱ្យយើងដើររហូតដល់សព្វថ្ងៃ។
នៅពេលនេះ ខ្ញុំនឹកឃើញដោយរំភើបចិត្តយ៉ាងខ្លាំងនូវភាពសំងាត់ដល់កំពូលនៅឆ្នាំ២០១១ ពេលយើងបានជួបជុំគ្នាជាមួយសម្តេចប៉ាប នៅទីក្រុងម៉ាដ្រីឌជាមួយយុវជនយុវនារីជាង១លាននាក់។ នៅពេលនោះ សម្តេចប៉ាបបានលុតជង្គង់នៅមុខព្រះកាយ ហើយយើងទាំងអស់គ្នាបានថ្វាយបង្គំនៅមុខព្រះកាយនៅក្នុងភាពស្ងៀមស្ងាត់មែនទែន ដោយសំលឹងមើលព្រះជាម្ចាស់។ ទោះបីព្រះអង្គមានព្រះជន្មច្រើនហើយក៏ដោយ ក៏សម្តេចប៉ាបបានណែនាំឱ្យយុវជននៅក្នុងពិភពលោក ចេះមើលឃើញអ្វីដែលសំខាន់បំផុតនៅក្នុងជីវិតរបស់យើង គឺព្រះយេស៊ូគ្រីស្តផ្ទាល់។
បងប្អូនជាទីស្រឡាញ់ ឱ្យយើងទុកពាក្យចុងក្រោយរបស់សម្តេចប៉ាប បេណេឌិកតូ ទី១៦ ដើម្បីរស់នៅក្នុងសេចក្តីសុខសាន្តដែលព្រះជាម្ចាស់ប្រទានមកយើង។ ព្រះអង្គអញ្ជើញយើងឱ្យយើងដើរតាមគំរូរបស់ព្រះអង្គ ឱ្យយើងដើរតាមផ្លូវនៃសេចក្តីស្រឡាញ់ដោយសុខចិត្តលះបង់ចោលជីវិតរបស់យើង ដើម្បីផលប្រយោជសម្រាប់បងប្អូនឯទៀតៗ នៅក្នុងការដាក់ចិត្តគំនិតយ៉ាងទាបបំផុត។ ពិតមែន ដើរឆ្ពោះទៅរកព្រះជាម្ចាស់បន្តិចម្តងៗ គឺជាសុភមង្គលដ៏ពេញលក្ខណៈ។ នៅពេលនេះ សម្តេចប៉ាបជាទីគោរពស្រឡាញ់របស់យើង បានទៅដល់វេលាដើម្បីមើលឃើញព្រះភ័ក្ត្ររបស់ព្រះជាម្ចាស់។ ព្រះភក្រ្តដែលព្រះអង្គបាននឹកឃើញ នៅពេលទ្រង់បានស្រាវជ្រាវជាទេវវិទូ ជាលោកបូជាចារ្យ ជាលោកអភិបាល ជាសម្តេចប៉ាបដែលដឹកនាំព្រះសហគមន៍នៅក្នុងពិភពលោក។ ជាពិសេស ១០ឆ្នាំចុងក្រោយជាលោកឪពុកដែលអធិដ្ឋាននៅក្នុងភាពស្ងៀមស្ងាត់ សម្រាប់ព្រះសហគមន៍នៅក្នុងពិភពលោក ដើម្បីរៀបចំជីវិតអស់កល្បជានិច្ច។
“ឱព្រះអម្ចាស់យេស៊ូគ្រីស្តអើយ! ខ្ញុំស្រឡាញ់ព្រះអង្គខ្លាំងណាស់ សម្តេចប៉ាបជាទីស្រឡាញ់សូមអធិដ្ឋានសម្រាប់យើងខ្ញុំ សូមទូលអង្វរដល់សន្តបុគ្គលទាំងឡាយដែលជាមិត្តសម្លាញ់របស់ព្រះអង្គ សម្រាប់ព្រះសហគមន៍កាតូលិកប្រទេសកម្ពុជាដ៏តូចតាចរបស់យើងខ្ញុំផង”។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
