ព្រះសហគមន៍មណ្ឌលសកម្មភាពទន្លេបាសាក់ រៀបចំប្រកួតកីឡាបាល់ទាត់មិត្តភាព ដើម្បីអបអរសាទរបុណ្យព្រះយេស៊ូប្រសូតនិងពញ្ញាក់អារម្មណ៍យុវជនឱ្យចាប់អារម្មណ៍ជាមួយព្រះសហគមន៍ ក៏ដូចជារបៀបនៃការប្រកាសដំណឹងល្អរបស់ព្រះសហគមន៍តាមរយ:អំណរសប្បាយ ដោយមានកីឡាករមកពីព្រះសហគមន៍ចំនួន៨ក្នុងភូមិភាគភ្នំពេញសរុប១៦០នាក់ចូលរួមប្រកួត។
កម្មវិធីកីឡានេះ ធ្វើឡើងនៅ ភូមិជ្រៃធំ ឃុំសំពៅពូន ស្រុកកោះធំ ខេត្តកណ្ដាល ដែលដឹកនាំដោយ លោកបូជាចារ្យទទួលខុសត្រូវមណ្ឌលសកម្មភាពទន្លេបាសាក់ សិលា សុខ ណា នាថ្ងៃទី២៩និង៣១ ធ្នូ ២០២២។
តាមប្រសាសន៍របស់លោកបូជាចារ្យ សុខ ណា បានឱ្យដឹងថា ការប្រកួតកីឡានេះជាឱកាសឱ្យយុវជនមានអំណរសប្បាយក្នុងការលេងកីឡាដោយចេះសហការជាក្រុម ក៏ដូចជាចាប់អារម្មណ៍លើព្រះសហគមន៍ផ្ទាល់ខ្លួនផងដែរ។ លោកបញ្ជាក់ទៀត គោលបំណងរបស់ព្រះសហគមន៍ក្នុងការរៀបចំប្រកួតកីឡានេះ ដើម្បីអបអរសាទរបុណ្យព្រះយេស៊ូប្រសូត ព្រោះក្នុងជីវិតសំខាន់របស់យើងជាគ្រីស្តបរិស័ទដោយចួបជុំចែករំលែកអំណរសប្បាយជាមួយគ្នានៅក្នុងពិធីបុណ្យរបស់យើង និងនៅក្នុងព្រឹត្តិការណ៍បាល់ទាត់របស់មណ្ឌលសកម្មភាព ដែលឆ្លងទៅព្រះសហគមន៍នានានៅតាមមណ្ឌលសកម្មភាពភូមិភាគភ្នំពេញ។
គង្វាលព្រះសហគមន៍ លោកសុខណា មានប្រសាសន៍ទៀតថា នេះជាសកម្មភាពដែលមណ្ឌលសកម្មភាពទន្លេបាសាក់បានរៀបចំជាលើកទី៣ក្នុងឆ្នាំ២០២២នេះ ដោយខិតខំប្រើអស់ពីលទ្ធភាពដែលយើងមាន ដើម្បីឱ្យយុវជនយើងអាចលេងសប្បាយជាមួយគ្នា និងសង្ឃឹមថាការលេងនេះ នាំឱ្យយុវជនចេះធ្វើការរួមគ្នា។ ជាពិសេសការលេងកីឡាធ្វើឱ្យយើងមានកាយសម្បទាមាំមួន និងស្មារតីច្បាស់លាស់ក្នុងការទទួលខុសត្រូវលើជីវិតទាំងផ្ទាល់ខ្លួន គ្រួសារនិងសង្គម ដែលនាំឱ្យមានសុខសន្តិភាពដោយបានលេងបែបសមូហភាពបែបនេះ ធ្វើឱ្យខ្ញុំបានឃើញទំនាក់ទំនងទាំងនេះជាឱកាសដើម្បីធ្វើការរស់នៅក្នុងសហគមន៍របស់ពួកគេផ្ទាល់ ដើម្បីសន្ទនាជាអន្តរសាសនា និងអន្តរជាតិសាសន៍ ដែលជារបៀបយើងប្រកាសដំណឹងល្អផងដែរ។
ជាមួយគ្នានេះដែរ លោកបានឱ្យដឹងទៀតថា «កម្មវិធីនេះធ្វើឱ្យខ្ញុំបានស្គាល់យុវជននៅក្នុងមណ្ឌលសកម្មភាពច្រើនជាងមុន ហើយខ្ញុំក៏បានឃើញពីផលលំបាករបស់យុវជនដែលមិនចេះអក្សរ ដូច្នេះខ្ញុំគិតពីការអភិវឌ្ឍធនធានមនុស្សដោយគ្រោងនឹងបង្កើតកម្មវិធីអក្ខរកម្មក្រៅប្រព័ន្ធក្នុងពេលឆាប់ៗនេះផងដែរ»។
កីឡាករ ចាន់ ដារ៉ា ២២ឆ្នាំមកពីព្រះសហគមន៍កោះនរាហ៍បានឱ្យដឹងថា នេះជាលើកទី២ដែលព្រះសហគមន៍កៅនរាហ៍ ចូលរួមប្រកួតជាមួយនឹងព្រះសហគមន៍មណ្ឌលសកម្មភាពទន្លេបាសាក់។ លោកនិយាយទៀតថា ការបង្កើតឱ្យមានការប្រកួតកីឡារវាងយុវជននិងយុវជននេះខ្ញុំយល់ឃើញថាល្អព្រោះថាបានស្គាល់ព្រះសហគមន៍កន្លែងផ្សេងដែលខ្ញុំមិនសូវស្គាល់ហើយតាមររយៈការចូលរួមនេះខ្ញុំបានស្គាល់ច្រើន។
លោកដារ៉ាបន្តថា ការស្គាល់គ្នារវាងយុវជននិងយុវជននេះបានជួយខ្ញុំឱ្យស្គាល់គ្នា ចេះសាមគ្គីគ្នាក្នុងពេលមានកម្មវិធីផ្សេងៗងាយស្រួលក្នុងការរៀបចំឱ្យបានល្អ។ ការស្គាល់គ្នារវាងព្រះសាគមន៍និងព្រះសហគមន៍ និងប្រមូលក្រុមជាមួយបងប្អូនជាពុទ្ធបរិស័ទផងនិង គ្រីស្តបរិស័ទផង ធ្វើឱ្យយើងអាចនិយាយជាមួយគ្នាបាន និងបើកចិត្តស្វាគមន៍ពួកគាត់។ កីឡាករ ដារ៉ា បញ្ជាក់ថា ការសន្ទនាគ្នាជាអន្តរសាសនាបែបនេះខ្ញុំសប្បាយចិត្តដោយធ្វើឱ្យគេគិតថា គ្រីស្តបរិស័ទរបស់យើងមិនប្រកាន់និងអាចសាមគ្គីចូលរួមជាមួយគ្នាបាន។ ទោះបីជាខ្ញុំស្ដាយដែលមិនបានយកពានដាក់នៅក្នុងព្រះសហគមន៍ទុកជាអនុស្សាវរីយ៍ ក៏ប៉ុន្តែពេលក្រោយយើងនឹងត្រៀមខ្លួនដោយព្យាយាមអស់ពីលទ្ធភាពដើម្បីទទួលយកពានលេខមួយឲ្យទាល់តែបាន។ ពេលនេះមិនបានលើកពានពិតមែនប៉ុន្តែពួកខ្ញុំសប្បាយចិត្តដែលបានចូលរួមអបអរសាទរបុណ្យព្រះយេស៊ូព្រះសូត្រជាមួយគ្នាតាមរយៈការលេងនេះ។
កីឡាករ ទ្រឹង រ៉េទី ក្នុងវ័យ៣៩ឆ្នាំ ជាកីឡាករប្រចាំព្រះសហគមន៍ជ្រៃធំប្រមាណជាង១០ ឆ្នាំកន្លងមកនេះ ខ្ញុំសប្បាយរីករាយដោយទទួលបានលេខ១ និងយល់ឃើញថាការប្រកួតនេះធ្វើឱ្យយើងដែលជាកូនចៅរបស់ព្រះសាគមន៍ អាចមកលេងចែករំលែកអំណរសប្បាយជាមួយគ្នាក្នុងពេលបុណ្យព្រះយេស៊ូព្រះសូត្រ។ ការប្រកួតកីឡាជុំគ្នានេះសម្រាប់ខ្ញុំជាគ្រីស្តបរិស័ទ ខ្ញុំយល់ឃើញថា កីឡាធ្វើឱ្យយើងមានសុខភាពល្អ ហើយយើងអាចរួបរួមគ្នានឹងចែករំលែកបទពិសោធគ្នាទៅវិញទៅមក និងក្នុងនាមយើងជាគ្រីស្តបរិស័ទយើងជាគ្រួសារតែមួយ។
ក្រុមកីឡាករដែលទទួលជ័យលាភីលេខ១ ទទួលបានទឹកប្រាក់ចំនួន១លានរៀល រួមជាមួយពាន១ ទង់តំណាងការប្រកួត១ មេដាយម្នាក់មួយ។ ក្រុមកីឡាករដែលទទួលបានជ័យលាភីលេខ២ ទទួលបានទឹកប្រាក់ចំនួន៨០ម៉ឺនរៀល រួមជាមួយទង់តំណាងការប្រកួត១ មេដាយម្នាក់មួយ។ ក្រុមកីឡាករដែលទទួលបានចំណាត់ថ្នាក់លេខ៣ ទទួលបានទឹកប្រាក់ចំនួន៦០ម៉ឺន ទង់តំណាងការប្រកួត១ មេដាយម្នាក់មួយ។ និងក្រុមកីឡាករដែលទទួលបានចំណាត់ថ្នាក់លេខ៤ទទួលទឹកប្រាក់ចំនួន២០ម៉ឺនរៀល ទង់តំណាងការប្រកួត១ មេដាយម្នាក់មួយ។
កីឡាករដែលមកប្រកួតតំណាងឱ្យព្រះសហគមន៍ទាំង៨មាន ព្រះសហគមន៍ជ្រៃធំ ស្អាង កោះទាវ បឹងឈូក (ដែលមកពីមណ្ឌលសកម្មភាពទន្លេបាសាក់) ព្រះសហគមន៍កោះនរាហ៍ រោងចក្រ(មកពីមណ្ឌលសកម្មភាពទន្លេមេគង្គ) ព្រះសហគមន៍អរិយក្សត្រ (មណ្ឌលសកម្មភាពភ្នំពេញខាងជើង) និងព្រះសហគមន៍ភ្នំពេញថ្មី(មណ្ឌលសកម្មភាពភ្នំពេញថ្មី)។
ដោយដាលីស
