តំណាងស្ថាប័នអប់រំរបស់ព្រះសហគមន៍កាតូលិកនៅកម្ពុជាចំនួន៨៥នាក់ បានចូលរួមស្តាប់ ពិភាក្សា និងលើកទិសដៅសម្រាប់វិស័យសិក្សាធិការក្នុងឆ្នាំបន្ទាប់របស់ព្រះសហគមន៍ ដើម្បី “ចូលរួមអភិវឌ្ឍសង្គមតាមរយៈគុណភាពនៃការអប់រំកាតូលិក” កាលពីពេលថ្មីៗកន្លងទៅនេះ នៅមណ្ឌលសកម្មភាពភ្នំពេញថ្មី និងសណ្ឋាគារបានបាន ក្នុងសង្កាត់ភ្នំពេញថ្មី។
នៅក្នុងរយៈពេលបីថ្ងៃ អ្នកចូលរួមបានរះគិតអំពីតួនាទីឧត្តមសិក្សាពាក់ព័ន្ធជាមួយនិងសេដ្ឋកិច្ច ធនធានមនុស្សនិងនយោបាយ គោលនយោបាយអភិវឌ្ឍន៍កម្មវិធីសិក្សាពីកម្រិតបឋមរហូតដល់មធ្យមសិក្សា និងចំណុចអាទិភាពរបស់ក្រសួងអប់រំ ការអប់រំបែបកាតូលិកក្នុងបរិបទពុទ្ធសាសនាជាដើម យុទ្ធសាស្ត្រទាញចំណាប់អារម្មណ៍របស់សិស្ស ដោយមានវាគ្មិនពីបណ្តាស្ថាប័នរដ្ឋ ឯកជន និងព្រះសហគមន៍។
សិក្ខាសាលានេះប្រព្រឹត្តទៅជាលើកដំបូងចាប់ពីថ្ងៃទី២-៤ ខែកុម្ភៈ រៀបចំដោយវិទ្យាស្ថានសន្តប៉ូល និងសហការចូលរួមដោយ មជ្ឈមណ្ឌលស្រាវជ្រាវជេស្វីត ម៉ាហ្គា អង្គការជេស្វីតកម្ពុជា សាលាបណ្ដុះបណ្ដាលវិជ្ជាជីវៈនិងបច្ចេកទេសដុនបូស្កូ ក្រោមអធិបតីភាពរបស់លោកអភិបាលព្រះសហគមន៍កាតូលិកទាំងបីភូមិភាគ។
នៅក្នុងឱកាសអភិបូជាបើកកម្មវិធីសិក្ខាសាលានេះ លោកអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ និងជាក្រុមប្រឹក្សាភិបាលនៃវិទ្យាស្ថានសន្តប៉ូលមានប្រសាសន៍ថា សាលាកាតូលិករបស់យើងមានតួនាទីសំខាន់គឺ បង្ហាញពន្លឺដែលណែនាំឲ្យមនុស្សលោកទទួលការសង្គ្រោះ។
លោកបន្ថែមថា ទោះបីស្ថិតនៅក្នុងបរិស្ថាននៃព្រះពុទ្ធសាសនាក៏ដោយ តែអត្តសញ្ញាណជាសាលា កាតូលិកសម្រាប់អប់រំសិស្សនិងនិស្សិតត្រូវថែរក្សា ដោយផ្តោតសំខាន់លើគោលការណ៍មួយចំនួន។
ក្នុងនោះលោកអភិបាលបានលើកឡើងអំពី គុណធម៌គិតលើប្រយោជន៍រួម ដោយអប់រំសិស្សឲ្យមានចិត្តស្មោះត្រង់ មានយុត្តិធម៌ និងសេចក្ដីពិត។ ការអប់រំគឺធ្វើយ៉ាងណា ឲ្យសិស្សចេះចែករំលែកដល់អ្នកដទៃដោយគ្មានអាត្មានិយមក្នុងខ្លួន ម្យ៉ាងទៀត ទំនាក់ទំនងឥរិយាបទកាយវាចារចិត្តរបស់សិស្ស គឺត្រូវផ្សារភ្ជាប់ជាមួយព្រះជាម្ចាស់។
«ទោះបីកាន់សាសនាផ្សេងក៏ដោយ ប៉ុន្តែគេមានទំនាក់ទំនងជាមួយព្រះជាម្ចាស់ដែលបានបង្កើតយើងទាំងអស់គ្នា» លោកអភិបាលបញ្ជាក់។
លោកបន្ថែមថា ការផ្តល់ឲ្យសិស្សមានគំនិតផ្ទាល់ខ្លួនដើម្បីវិនិច្ឆ័យក្នុងមាគ៌ាត្រឹមត្រូវសម្រាប់អនាគត គឺដើម្បីបំភ្លឺមនសិការរបស់ពួកគេយល់អំពីផ្លូវត្រឹមត្រូវនិងផ្លូវដែលបំផ្លាញអនាគតរបស់មនុស្សជាតិ។ ហើយស្ថាប័នអប់រំកាតូលិកត្រូវយកចិត្តទុកដាក់លើគ្រូបង្រៀននិងសិស្ស ដោយផ្តល់នូវសេរីភាពនិងការវិន័យច្បាស់លាស់ដល់ពួកគេ។
លោកអភិបាលអូលីវីយ៉េបញ្ជាក់ថា ការណែនាំឲ្យសិស្សម្នាក់ៗរីកចម្រើននៅក្នុងសមត្ថភាពផ្ទាល់ខ្លួនទាំងកាយវាចារចិត្តនិងវិញ្ញាណ ទាំងទំនាក់ទំនងក្នុងសង្គម វប្បធម៌និងពិភពលោកទាំងមូល និងការផ្តល់ជំនឿចិត្តជាមួយទេពកោសល្យរបស់សិស្សម្នាក់ៗ ថាគេអាចបង្កើតសន្តិភាពនៅកន្លែងដែលគេរស់នៅបាន ជាគោលការណ៍បន្ថែមទៀតដែលត្រូវធ្វើ។
លោកបានបញ្ចប់ដោយរំលឹកដល់អ្នកចូលរួមទាំងអស់ឲ្យខិតខំអធិដ្ឋាន ដើម្បីទទួលបានជោគជ័យ ក្នុងការអប់រំ និង«ដើម្បីឲ្យយើងរកឃើញកម្លាំងមកពីព្រះយេស៊ូដើម្បីបំភ្លឺយើង ឱ្យយើងទៅជាសាក្សីនៃជីវិតដ៏ពេញលក្ខណៈដែលព្រះអង្គបានប្រទានឲ្យយើង»។
នៅក្នុងជំនួបនេះ សិក្ខាកាមបានឈ្វេងយល់បន្ថែមអំពីកិច្ចការអន្តរសាសនាដែលនាំមកនូវកិច្ចសហប្រតិបត្តិការណ៍ល្អនៅក្នុងវិស័យអប់រំនិងជំនឿ ដើម្បីរស់នៅដោយសុខដុមនីយកម្មសាសនា ដែលធ្វើបទបង្ហាញដោយលោកអេនរីគេ ហ្វីការេដូ អភិបាលព្រះសហគមន៍កាតូលិកភូមិភាគបាត់ដំបង និងព្រះតេជគុណ វិ សុវិជ្ជា ជាប្រធានសាខាពុទ្ធិករវិទ្យាល័យព្រះសីហនរាជ សាខាខេត្តបាត់ដំបង។
ស៊ិន សាយា វ័យ៣០ឆ្នាំ ជាអ្នកសម្របសម្រួលនៃសាលាសន្តសាវីយ៉េ ខេត្តបន្ទាយមានជ័យ បានឱ្យដឹងថា ការអប់រំរបស់ព្រះសហគមន៍បានរួមចំណែកដល់សង្គមនិងពិភពលោកយ៉ាងច្រើន ដោយបានផ្ដោតសំខាន់លើគុណតម្លៃរបស់មនុស្ស។
អ្នកគ្រូបន្ថែមថា គាត់នឹងជំរុញបន្ថែមនូវគោលការណ៍របស់ព្រះសហគមន៍នៅក្នុងសាលារបស់គាត់ គឺឲ្យសិស្សចែករំលែកសេចក្ដីស្រឡាញ់ ឲ្យគេយល់អំពីតម្លៃគ្នាទៅវិញទៅមក មិនរើសអើង ចេះសហការ ចេះចែករំលែកនិងមានមេត្តាធម៌ ដែលនាំឲ្យសង្គមកម្ពុជាឬក៏ពិភពលោកមានការអភិវឌ្ឍ។
លោកហ៊ាង ឈុនឡេង វ័យ ២៩ឆ្នាំ ជានាយករងនៃវិទ្យាល័យចម្រើនវិជ្ជា ក្នុងខេត្តព្រៃវែង បានឱ្យដឹងថា ការស្តាប់នូវយោបល់និងបញ្ហាផ្សេងៗរបស់សាលាដទៃតាមភូមិភាគនីមួយៗ និងគោលការណ៍របស់ព្រះសហគមន៍ ណែនាំឲ្យលោកមានគំនិតមួយចំនួន ដើម្បីអនុវត្តនៅសាលាចម្រើនវិជ្ជាបាន ទាំងរបៀបដឹកនាំ គរុកោសល្យនៃការអប់រំ និងអត្តសញ្ញាណកាតូលិក។
នៅក្នុងសិក្ខាសាលានោះដែរ សិក្ខាកាមបានចូលរួមពិភាក្សានិងស្វែងរកដំណោះស្រាយខ្លះសម្រាប់សិស្សដែលមានបញ្ហា ទាងផ្លូវកាយនិងចិត្ត រួមទាំងស្មារតីផងដែរ។
«ទាក់ទងទៅនឹងជួយសិស្សដែលរៀនខ្សោយ យើងត្រូវសិក្សាពីស្ថានភាពគ្រួសាររបស់គាត់ជាមុនសិន និងតាមដានសិស្សនិងបំប៉នគាត់ឡើងវិញ។» នេះជាការលើកឡើងរបស់ លោកពេជ្រ វិបុល នាយកវិទ្យាល័យសន្តហ្វ្រង់ស្វ័រ ក្នុងខេត្តតាកែវ។
លោកវិបុលបន្តថា យើងត្រូវអភិវឌ្ឍធនធានមនុស្សលើគ្រប់វិស័យទាំងអស់ ឱ្យមនុស្សមានចំណេះដឹង ចេះរស់នៅដោយសន្តិភាពនិងសុខដុមរមនាជាមួយគ្នាតាមរយៈអន្តរសាសនា។ ចំពោះថ្នាក់ដឹកនាំសាលា យើងមានតួនាទីភារកិច្ចយកអ្វីដែលជាបទពិសោធនៅទីនេះ ទៅផ្សព្វផ្សាយបន្ត ដើម្បីជោគជ័យទាំងអស់គ្នា។
នៅថ្ងៃបញ្ចប់ លោកអភិបាលអូលីវីយ៉េ បានជំរុញឲ្យស្ថាប័នសិក្សារបស់ព្រះសហគមន៍ទាំងអស់ក្នុងឆ្នាំ២០២៣នេះ មានការិយាល័យសិក្សាធិការកាតូលិកនៅតាមភូមិភាគច្បាស់លាស់ ដើម្បីមានអត្តសញ្ញាណ ធនធានមនុស្ស ទស្សនៈ គម្រោងការ និងទំនាក់ទំនងជាមួយរដ្ឋាភិបាលច្បាស់លាស់។ ហើយការិយាល័យនេះ ត្រូវគ្រប់គ្រងនិងមើលលើគម្រោងការនិងប្រព័ន្ធអប់រំគ្រប់កម្រិតទាំងអស់ ដោយភ្ជាប់ទំនាក់ទំនងជាមួយគ្រូបង្រៀន និងអាណាព្យាបាលសិស្ស ដើម្បីប្រសិទ្ធភាពនិងគុណភាពនៃការអប់រំកាតូលិក។ បញ្ច្រៀបគោលការណ៍និងគំនិតរបស់ព្រះសហគមន៍ដល់បុគ្គលិកសិក្សា ដោយមានសិក្ខាសាលាតាមកម្រិតសិក្សា ដើម្បីបង្កើតទស្សនៈកាតូលិកតាមសាលានីមួយៗ៕
ដោយដាលីស
