ក្នុងឆ្នាំ២០២៣នេះ ព្រះសហគមន៍កាតូលិកនៅកម្ពុជានឹងត្រៀមរៀបចំពិធីជម្រុជទឹកដល់បេក្ខជនសរុបចំនួន២៣៦នាក់ដែលរស់នៅក្នុងតំបន់ផ្សេងក្នុងប្រទេសកម្ពុជានាឱកាសបុណ្យព្រះយេស៊ូមានព្រះជន្មរស់ឡើងវិញដ៏រុងរឿងខាងមុខនេះ។
កាលពីថ្ងៃទី២៦ ខែកុម្ភៈនេះ លោកអភិបាលទាំងបីភូមិភាគរបស់ព្រះសហគមន៍កាតូលិកនៅកម្ពុជាធ្វើពិធីត្រាស់ហៅបេក្ខជនម្នាក់ៗដើម្បីបង្ហាញខ្លួនជាផ្លូវការណ៍ និងត្រៀមខ្លួនទទួលអគ្គសញ្ញាជ្រមុជទឹក។
នឿន សាមី វ័យ ២១ រស់នៅក្នុងទីក្រុងភ្នំពេញកំពុងសិក្សាជំនាញអគ្គិសនីឆ្នាំទី១ និយាយថា «ខ្ញុំស្គាល់ព្រះសហគមន៍តាំងពីតូច ដោយនៅផ្ទះមានពូម្នាក់ជាគ្រីស្តស័ទ»។
ទង្វើរបស់ពូ ឃ្លាគម្ពីរ និងសកម្មភាពព្រះសហគមន៍ក្នុងតំបន់ បានជំរុញចិត្តយុវ័នរូបនេះ ចង់កែប្រែជីវិតរបស់ខ្លួន។ សាមីបន្តថា តាមរយៈការមើលឃើញព្រះសហគមន៍ចេះរំលែកសេចក្ដីស្រឡាញ់ឱ្យគ្នា ជួយអ្នកក្រីក្រ និងឃ្លាគម្ពីរមួយដែលដក់ក្នុងចិត្តរបស់គាត់គឺ «ចូរស្រឡាញ់អ្នកដទៃឱ្យដូចព្រះជាម្ចាស់ស្រឡាញ់យើង»។
«ព្រះបន្ទូលនេះបានណែនាំឱ្យយើងចេះស្រឡាញ់អ្នកដទៃទាំងអ្នកក្រីក្រនិងអ្នកពិការផងដែរ ធ្វើឱ្យខ្ញុំចង់ក្លាយជាគ្រីស្តបរិស័ទ។» សាមី បញ្ជាក់។
មិនសូវខុសគ្នាពីសាមី ការមើលឃើញសកម្មភាពមនុស្សធម៌របស់ព្រះសហមន៍និងកិច្ចសហការគ្នាគឺជាចំណុចមួយដែលជួយដល់យុវជនជាច្រើនកែប្រែជំនឿ។
នឿ សុវណ្ណនី អាយុ១៦ឆ្នាំរស់នៅខេត្តតាកែវ និយាយថា នាងបានត្រៀមខ្លួនទទួលអគ្គសញ្ញាជ្រមុជទឹករួចរាល់ហើយ។ យុវតីរូបនេះសម្រេចចិត្តកែប្រែជីវិតរស់នៅតាមរបៀបថ្មីចាប់ពីពេលនេះទៅ ដោយនាងបន្ថែមថា «ខ្ញុំត្រូវមានចិត្តស្មោះត្រង់ គោរពស្រឡាញ់គេ ចែករំលែក និងមានចិត្តអត់ធ្មត់ដូចគំរូលោកអភិបាល»។
រំឭកពីទម្លាប់អតីតកាលសុវណ្ណនីឱ្យដឹងថា «ពីមុនខ្ញុំជាមនុស្សខ្ជិល មិនសូវចេះចែករំលែក តែក្រោយបានស្គាល់ព្រះសហគមន៍៥ឆ្នាំកន្លងមក តាមរយៈមិត្តភក្តិ និងការសិក្សានៅវិទ្យាល័យសន្តហ្វ្រង់ស្វ័រដែលជាសាលារបស់ព្រះសហគមន៍កាតូលិក ធ្វើឱ្យខ្ញុំបានកែប្រែទម្លាប់ទាំងនេះ»។
សេស៊ីលីយ៉ា ភឿត ស៊ីថា រស់នៅខេត្តបាត់ដំបងនិយាយថា ក្រោយទទួលពិធីត្រាស់ហៅនេះ នាងបានប្តេជ្ញាចិត្តនឹងប្រកាសជំនឿរបស់ខ្លួនដល់អ្នកដទៃ និងជួយដល់អ្នកក្រីក្រ អ្នកទន់ខ្សោយដែលកំពុងខ្វះខាត ជាពិសេសចូលរួមជួយព្រះសហគមន៍តាមសកម្មភាពផ្សេងៗ។
បេក្ខជន២៣៦នាក់នេះ មាននៅក្នុងភូមិភាគភ្នំពេញចំនួន៩៥នាក់ បាត់ដំបងចំនួន៣៧នាក់ និងកំពង់ចាមចំនួន១០៤នាក់ ដែលភាគច្រើនជាយុវជន។ កម្មវិធីនេះ បានធ្វើឡើងដំណាលគ្នានៅក្នុងខេត្តក្រុងចំនួន៣ គឺនៅភូមិភាគភ្នំពេញធ្វើនៅព្រះវិហារសន្តសិលានិងសន្តប៉ូលនាទីក្រុងភ្នំពេញ ភូមិភាគបាត់ដំបងធ្វើនៅព្រះវិហារព្រះជាម្ចាស់លើកព្រះនាងម៉ារីឡើងស្ថានបរមសុខនាក្រុងបាត់ដំបង និងភូមិភាគកំពង់ចាមធ្វើនៅខេត្តមណ្ឌលគិរី។
លោកអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ មានប្រសាសន៍នៅ ទីក្រុងភ្នំពេញថា ថ្ងៃនេះជាពិធីមួយយ៉ាងពិសេសសម្រាប់ភូមិភាគភ្នំពេញក៏ដូចជាភូមិភាគនីមួយៗ និងនៅក្នុងពិភពលោកដែលកំពុងស្វាគមន៍ជាផ្លូវការយ៉ាងឱឡារិក សម្រាប់បេក្ខជនដែលសូមទទួលជីវិតថ្មីពីព្រះជាម្ចាស់នៅយប់បុណ្យចម្លងខាងមុខនេះ។
ពិធីឱឡារិកនេះ ធ្វើក្នុងរដូវអប់រំពិសេសដែលមានរយៈពេល៤០ថ្ងៃមុនបុណ្យព្រះយេស៊ូមានព្រះជន្មរស់ឡើងវិញដ៏រុងរឿង។ លោកអភិបាលអូលីវីយ៉េ បញ្ជាក់ថា ៤០ថ្ងៃជាពេលវេលាពិសេសដើម្បីមានទំនាក់ទំនងមួយដ៏ពិសេសជាមួយព្រះជាម្ចាស់ ដែលណែនាំឲ្យយើងរកឃើញព្រះជាម្ចាស់ផ្ទាល់។
ក្នុងនោះដែរ លោកអភិបាលអូលីវីយ៉េ អញ្ជើញបងប្អូនឱ្យធ្វើដំណើររួមជាមួយព្រះយេស៊ូ តាមរបៀបសន្តីតេរេសានៃព្រះកុមារយេស៊ូ ដោយទទួលស្គាល់ភាពទន់ខ្សោយនិងខិតខំកែប្រែ ដើម្បីឱ្យជីវិតរបស់យើងភ្ជាប់នឹងព្រះហឫទ័យរបស់ព្រះជាម្ចាស់ នៅក្នុងសេចក្ដីស្រឡាញ់ប្រចាំថ្ងៃ។
លោកបន្ថែមថា «យើងត្រូវតែទុកចិត្តលើព្រះឧបការគុណរបស់ព្រះជាម្ចាស់ ដោយយកព្រះជាម្ចាស់ជាទីពឹង និងជាប្រភពនៃជីវិត»។
ក្នុងធម្មទេសនានៅព្រះវិហារព្រះជាម្ចាស់លើកព្រះនាងម៉ារីឡើងស្ថានបរមសុខ នាខេត្តបាត់ដំបង លោកអេនរីគេ ហ្វីការេដូ អភិបាលព្រះសហគមន៍កាតូលិកភូមិភាគបាត់ដំបងមានប្រសាសន៍ថា បេក្ខជនទាំងនេះ គឺជា «សេចក្តីសង្ឃឹមរបស់ព្រះសហគមន៍ និងឲ្យយើងដឹងថាព្រះសហគមន៍មាន ជីវិតដោយបងប្អូនមានកម្លាំង និងមានព្រះវិញ្ញាណគង់សណ្ឋិត ក្នុងការដើរតាមព្រះបន្ទូលព្រះអង្គ»។
លោកអភិបាលអេនរីគេ បន្តដោយសង្ឃឹមថាបងប្អូន នឹងក្លាយ ទៅជាប្រជាជនដ៏ល្អនៅក្នុងប្រទេសកម្ពុជា និងធ្វើសក្ខីភាពអំពីជំនឿរបស់ព្រះជាម្ចាស់ ដែលនាំឲ្យសង្គមយើងមានសេចក្តីសុខ សន្តិភាព និងយុត្តិធម៌សម្រាប់អ្នកក្រីក្រ។
លោកសិលា សួនហង្សលី អភិបាលព្រះសហគមន៍កាតូលិកភូមិភាគកំពង់ចាមមានប្រសាសន៍នៅព្រះវិហារសន្តយ៉ូហានបាទីស្តនៅមណ្ឌលគិរីថា «នេះជាព្រឹត្តិការណ៍អស្ចារ្យមួយសម្រាប់ព្រះសហគមន៍ ដែលក្នុងឆ្នាំនេះ មានបងប្អូនចំនួន១០៤នាក់ដែលទួលពិធីត្រាស់ហៅ ជាសញ្ញាបង្ហាញថា ព្រះសហគមន៍របស់យើងកំពុងរីកចម្រើនឡើង។» លោកបន្ថែមថា សេចក្តីនេះ បាននាំឲ្យលោកមានកម្លាំងដើម្បីបន្តការអធិដ្ឋានតទៅមុខទៀត ដើម្បីឲ្យដំណឹងល្អរបស់ព្រះជាម្ចាស់បានទៅដល់មនុស្សជាច្រើនក្នុងប្រទេសកម្ពុជា ឲ្យពួកគាត់អាចទទួលបានជីវិតអស់កល្បជានិច្ចរួមជាមួយព្រះអង្គ។ លោកផេវ វៀន បេក្ខជនៅខេត្តមណ្ឌលគិរី ឲ្យដឹងថា លោកនឹងខិតខំអធិដ្ឋានឲ្យព្រះយេស៊ូលើកលែងទោសឲ្យគាត់ និងជួយគាត់ឲ្យមានជំនឿកាន់តែរឹងមាំដើម្បីអាចចូលរួមក្នុងសកម្មភាពរបស់ព្រះសហគមន៍និងប្រកាសដំណឹងល្អដល់អ្នកដទៃ។ ក្នុងអំឡុងពេលត្រៀមខ្លួនជ្រមុជទឹកនេះ ដូត ស្រីលីន ពីខេត្តកំពង់ចាម បាននិយាយថា នាងខិតខំស្តាប់តាមព្រះបន្ទូលនិងអនុវត្តតាម គោរពច្បាប់ព្រះសហគមន៍កាតូលិក អធិដ្ឋានតមអាហារនិងចែកទាន៕
លោកបន្ថែមថា សេចក្តីនេះ បាននាំឲ្យលោកមានកម្លាំងដើម្បីបន្តការអធិដ្ឋានតទៅមុខទៀត ដើម្បីឲ្យដំណឹងល្អរបស់ព្រះជាម្ចាស់បានទៅដល់មនុស្សជាច្រើនក្នុងប្រទេសកម្ពុជា ឲ្យពួកគាត់អាចទទួលបានជីវិតអស់កល្បជានិច្ចរួមជាមួយព្រះអង្គ។
លោកផេវ វៀន បេក្ខជនៅខេត្តមណ្ឌលគិរី ឲ្យដឹងថា លោកនឹងខិតខំអធិដ្ឋានឲ្យព្រះយេស៊ូលើកលែងទោសឲ្យគាត់ និងជួយគាត់ឲ្យមានជំនឿកាន់តែរឹងមាំដើម្បីអាចចូលរួមក្នុងសកម្មភាពរបស់ព្រះសហគមន៍និងប្រកាសដំណឹងល្អដល់អ្នកដទៃ។
ក្នុងអំឡុងពេលត្រៀមខ្លួនជ្រមុជទឹកនេះ ដូត ស្រីលីន ពីខេត្តកំពង់ចាម បាននិយាយថា នាងខិតខំស្តាប់តាមព្រះបន្ទូលនិងអនុវត្តតាម គោរពច្បាប់ព្រះសហគមន៍កាតូលិក អធិដ្ឋានតមអាហារនិងចែកទាន។
ក្នុងពិធីអប់រំជំនឿរបស់ព្រះសហគមន៍កាតូលិកនៅកម្ពុជា បេក្ខជនម្នាក់ៗត្រូវចំណាយពេលយ៉ាងតិចណាស់១ឬ២ឆ្នាំ ដើម្បីទទួលអគ្គសញ្ញាជ្រមុជទឹក ដោយមានដំណាក់កាលចំនួន២ គឺពិធីសុំចូលព្រះសហគមន៍ និងពិធីត្រាស់ហៅយ៉ាងឱឡារិកពីលោកអភិបាលក្នុងភូមិភាគនីមួយៗ។ ក្រោយពិធីត្រាស់ហៅដែលជាជំហានត្រៀមក្លាយជាគ្រីស្តបរិស័ទ បេក្ខជនត្រូវចូលរួមសំណាក់ធម៌ជារៀងរាល់មួយអាទិត្យម្តងរិះគិតអំពីជីវិតនិងជំនឿដែលព្រះសហគមន៍ហៅថា ពិធីជម្រះចិត្ត។
ដោយសួនស្រីហួចដាលីស សេងមួយ និងស៊ីអេសស៊ីកំពង់ចាម
