លោកអភិបាលអូលីវីយេ បានដឹកនាំគណៈប្រតិភូ នៃព្រះសហគមន៍កាតូលិក ចូលជួបសំណេះសំណាលការងារជាមួយ ឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនាដែលទើបចូលកាន់តំណែងនាពេលថ្មីនេះ ដើម្បីជម្រាបជូននូវកិច្ចការសាសនារបស់ព្រះសហគមន៍កាតូលិកនៅកម្ពុជានៅព្រឹកថ្ងៃទី ២៦ ខែឧសភា ឆ្នាំ ២០២០ នៅទីស្តីការក្រសួងធម្មការ និងសាសនា រាជធានីភ្នំពេញ។
ក្នុងពិធីសំណេះសំណាលនេះ លោកអភិបាល អូលីវីយេ បានជំរាបជូន ឯកឧត្តមរដ្ឋមន្ត្រីក្រសួងធម្មការ និងសាសនា អំពីរចនាសម្ពនព្រះសហគមន៍កាតូលិកនៅកម្ពុជា ដែលជាមានសម្តេចប៉ាបជាប្រមុខដឹកនាំ ហើយក៏ជាមេដឹកនាំប្រទេសមួយដែរ ដែលមានចំណងការទូតចំនួនប្រមាណជា១៩០ប្រទេស លើពិភពលោក ក្នុងនោះក៏មានប្រទេសកម្ពុជាផងដែរ។
ប្រវត្តិព្រះសហគមន៍នៅកម្ពុជា៖
លោកអភិបាលអូលីវីយេ បានលើកឡើងអំពីប្រវត្តិរបស់ព្រះសហគមន៍កាតូលិកនៅកម្ពុជា ដែលបាននាំដំណឹងល្អមកដល់ទឹកដីដ៏ល្អនេះ នៅឆ្នាំ១៥៥៥។ បន្តិចម្តងៗមានការរីកចម្រើន។ លោកអភិបាលក៏បានជំរាបជូនលោករដ្ឋមន្ត្រី អំពីទីតាំងប្រវត្តិសាស្ត្ររបស់ព្រះសហគមន៍កាតូលិក ដែលមានប្រមាណ២៣ទីតាំង នៅទីក្រុងភ្នំពេញដែលជាអតីតកម្មសិទ្ធិរបស់ព្រះសហគមន៍កាតូលិកពីដើមមុនសម័យសង្គ្រាមស៊ីវិល ដែលមនុស្សវ័យចំណាស់ធ្លាប់នៅភ្នំពេញបានស្គាល់និងចាំឈ្មោះមាន សាលាមីស សាលាដូនជី នៅជ្រោយចង្វារមានទេវវិទ្យាល័យ អារ៉ាមបងស្រីកាម៉ែល វិសាលវិហារ និងអាគារនៃសាលារាជធានីភ្នំពេញជាអតីតគេហដ្ឋានរបស់លោកអភិបាលព្រះសហគមន៍ពីដើម។
លោកអភិបាលក៏បញ្ជាក់ដែរថា រាល់កម្មសិទ្ធិ និងវិហារទាំងឡាយត្រូវបំផ្លាញទាំងស្រុង សល់តែអាគារព្រះវិហារចំនួនបីកន្លែង គឺវិហារនៅបូកគោ ព្រះវិហារនៅកំពង់សោម និង វិហារតូចនៅផ្សារតូចភ្នំពេញ។
ក្រៅពីអចលនវត្ថុ ព្រះសហគមន៍ក៏បាត់បង់នូវធនធានមនុស្សជាច្រើន ដោយរួមទាំងលោកអភិបាលជាតិខ្មែរមួយរូបដំបូងគេផង គឺ លោកអភិបាលឆ្មារ សាឡាស់ ដែលទទួលអគ្គសញ្ញាតែងតាំង ក្នុងឆ្នាំនៃការផ្ទុះសង្គ្រាម។
លោកអភិបាលបន្តថា «ឆ្នាំ៧៥ យើងបាត់បង់ទាំងអស់។ យើងត្រឡប់មកវិញនៅឆ្នាំ៩០។ នៅឆ្នាំ៧៥ នៅថ្ងៃទី១៤ ខែមេសា បានតែងតាំងលោកអភិបាលខ្មែរទី១ ឈ្មោះឆ្មារ សាឡាស់។ ក្រោយមកជនបរទេសត្រូវចេញ ត្រូវបណ្តេញពីប្រទេសកម្ពុជា ប៉ុន្តែ លោកឆ្មារ សាឡាស់ ជាមួយបងប្អូនគាត់ដែលជាបូជាចារ្យខ្លះដែរ ត្រូវជម្លៀសទៅដល់តាំងគោក ស្រុកបារាយណ៍ ខេត្តកំពង់ធំ។ នៅឆ្នាំ៧៧ គាត់ស្លាប់ ដូច្នេះយើងអត់មានអ្នកដឹកនាំសាសនានៅក្នុងប្រទេសកម្ពុជាពីឆ្នាំ៧៧ រហូតដល់ឆ្នាំ៩០។ ឆ្នាំ៩០ សាសនទូតចាស់បានត្រឡប់មកវិញមួយចំនួន ជាលោកអភិបាលពីដើមគឺអភិបាលអ៊ីវរ៉ាមូស»។
លោកអភិបាលបានលើកបង្ហាញជូនរដ្ឋមន្ត្រីនូវឈើឆ្កាងលោកអភិបាល ដោយបញ្ជាក់ថា ឈើឆ្កាងនេះ មានអាយុជាង១០០ឆ្នាំ ជាឈើឆ្កាងលោកអភិបាលភ្នំពេញក្នុងឆ្នាំ១៩០០ ហើយត្រូវបានបញ្ជូនបន្តរហូតដល់លោកជាអភិបាលសព្វថ្ងៃ ដែលជាអភិបាលជំនាន់ទី២៤នៃភូមិភាគភ្នំពេញ។ លោកអភិបាលបានរំលឹកថា នៅពេលលោកឆ្មារ សាឡាស់តែងតាំងជាអភិបាល បានទទួលឈើឆ្កាងនេះ ហើយម្តាយរបស់គាត់បានលាក់ឈើឆ្កាងនេះនៅក្នុងសំបុកមាន់ កុំឲ្យខ្មែរក្រហមរកឃើញ។ ដូច្នេះ ឈើឆ្កាងនេះជាវត្ថុប្រវត្តិសាស្ត្រ និងបានឆ្លងសតវត្សនិងឆ្លងសម័យខ្មែរក្រហម។
បច្ចុប្បន្នភាពរបស់ព្រះសហគមន៍៖
ក្រោយសង្គ្រាមស៊ីវិលបញ្ចប់ សាសនទូតបានវិលមកកម្ពុជាវិញ ហើយនៅឆ្នាំ១៩៩៣ បានទិញដីព្រះវិហារនៅផ្សារតូច ដែលពីដើមជាអនុទេវវិទ្យាល័យ។ លោកអភិបាលអូលីវីយេក៏បញ្ជាក់លោករដ្ឋមន្ត្រីដែរថា នៅឆ្នាំ២០១០ ក្នុងនាមជាលោកអភិបាល លោកបានទិញដីសម្រាប់ព្រះសហគមន៍កាតូលិកនៅភ្នំពេញថ្មី ដែលជាទីតាំងសកម្មភាពមួយ និងជាកន្លែងរស់នៅនិងធ្វើការងាររបស់លោកអភិបាលផ្ទាល់។ ព្រះសហកមន៍កាតូលិកបានចាប់ផ្តើមរីកចម្រើនបន្តិចម្តងៗ។
លោកមានប្រសាសន៍ទៀតថា «ឆ្នាំ២០០២ ខ្ញុំនៅតាកែវ ដូច្នេះនៅតាកែវបានចាប់ផ្តើមច្រើនក្នុងវិស័យអប់រំសិក្សា មានដូចជា វិទ្យាស្ថានសន្តប៉ូល សាលាផ្សេងៗ និងសកម្មភាពអភិវឌ្ឍច្រើនប្រហែលឯកឧត្តមធ្លាប់ឃើញ។ នៅ ឆ្នាំ២០០២ ខ្ញុំជិតស្និទ្ធមែនទែនជាមួយឯកឧត្តមចាន់សារ៉ុន រដ្ឋមន្ត្រីក្រសួងកសិកម្ម។ ឯកឧត្តមបានដើរជាមួយខ្ញុំ បានជម្រុងខ្ញុំ បានលើកទឹកចិត្តខ្ញុំ បានណែនាំឲ្យយើងបានជោគជ័យកម្មវិធីកសិកម្មផង សាលាឯកទេសផង វិទ្យាស្ថានផង រហូតដល់ខ្ញុំបានចូលសញ្ជាតិខ្មែរនៅឆ្នាំ២០១០ តាមរយៈឯកឧត្តមចាន់សារ៉ុន»។
សម្រាប់កិច្ចការសង្គមផ្សេងទៀត លោអភិបាលភូមិភាគភ្នំពេញ ក៏បានលើកឡើងពី សម្ពន្ធអង្គការកាតូលិក ចំនួន២៧ ក្នុងនោះមានអង្គការការីតាសកម្ពុជាផងដែរ ដែលកំពុងបំពេញមុខងារយ៉ាងសកម្មបម្រើប្រជាពលរដ្ឋកម្ពុជា ក្នុងវិស័យការសិក្សា អភិវឌ្ឍជនបទ កសិកម្ម និងសង្គមកិច្ច ជាដើម ។ ជាមួយគ្នានេះព្រះសហគមន៍បានខិតខំ កសាងកិច្ចសន្ទនាបែបអន្តរសាសនា ជាមួយសាសនាទាំងបីយ៉ាងសកម្ម ដើម្បីសុខដុមនីយកម្មសាសនានិងសាសនានៅកម្ពុជា។
សកម្មភាពរបស់ព្រះសហគមន៍ក្នុងសង្គម និងកិច្ចការសាសនាក្នុងអំឡុពេលកូវីដ១៩៖
ព្រះសហគមន៍កាតូលិកនៅកម្ពុជា បានចូលរួមប្រយុទ្ធនឹងជំងឺកូវីដ ១៩ រួមជាមួយរាជរដ្ឋាភិបាលកម្ពុជា ដោយគោរពតាមការណែនាំនានារបស់រាជរដ្ឋាភិបាល ក្រសួងសុខាភិបាល ក្រសួងអប់រំ និងក្រសួងធម្មការជាដើម។
លោកអភិបាលបានបន្ថែមថា ចាប់តាំងពីថ្ងៃទី១៧ ខែមីនា ឆ្នាំ ២០២០ ព្រះសហគមន៍ផ្អាកដំណើរការសាលារៀន ដោយបង្កើតកម្មវិធីរៀនពីចម្ងាយតាមប្រព័ន្ធអេឡិចត្រូនិច សម្រាប់កម្មវិធីសិក្សាគ្រប់កំរិត។ ពិធីសាសនា ក៏ត្រូវផ្អាក ទោះបីចំពេលបុណ្យព្រះយេស៊ូមានព្រះជន្មរស់ឡើងវិញ ជាបុណ្យធំសំខាន់បំផុតសម្រាប់ព្រះសហគមន៍កាតូលិកក៏ដោយ។ ប៉ុន្តែយើងប្រារព្ធតាមប្រព័ន្ធផ្សព្វផ្សាយសង្គម។
ទោះជាយ៉ាងនេះក្តីលោកអភិបាលជម្រាបថា «គឺមិនស្រួលឡើយ។ យើងបានពិបាក ប៉ុន្តែយើងបានតស៊ូមែនទែន ។ យើង LIVE អភិបូជា សូត្រធម៌ យើងធ្វើសរុបរហូតដល់សព្វថ្ងៃចំនួន៦៩កម្មវិធីតាម LIVEតាមអ៊ីនធឺណេត តាមYOUTUBE, FACEBOOK ប៉ុន្តែនេះក៏ពិបាកដែរ»។
លោកបញ្ជាក់ថា គេមើលតាមផ្ទះជួនកាលគេមើល មិនមើល យាយៗតាៗដែលអត់មានអ៊ីធឺណេត «ខ្ញុំមានមួយចំនួនទោះបីខ្ញុំផ្ញើឯកសារក៏ដោយក៏អត់ចេះអានទេ អត់ចេះអានគម្ពីរ»។ លោកបានសម្តែងក្តីបារម្ភទៀតថា «គ្រីស្តបរិស័ទកាតូលិក ជាគ្រីស្តបរិស័ទជំនាន់ទី១អត់មានឫសជ្រៅនៅក្នុងជំនឿផ្ទាល់ខ្លួន»។
ក្នុងអំឡុងពេលកូវីដ១៩ តើព្រះសហគមន៍អាចជួបជុំលក្ខណៈក្រុមតូចៗបានទេ?
ទាក់ទងនឹងក្តីបារម្ភខាងលើ លោកអភិបាលបានលើកពីប្រសាសន៍របស់សម្តេចតេជោ នាយករដ្ឋមន្ត្រីដែលបានអនុញ្ញាតឲ្យមានការជួបជុំតែមិនមែនលក្ខណៈធំ «ខ្ញុំចង់សួរឯកឧត្តម តើខាងយើង ទោះបីពុទ្ធសាសនាតាមពិតជួបជុំគ្នាខ្លះៗ តើយើងអាចជួបជុំគ្នាខ្លះៗជាក្រុមតូច ដើម្បីថ្វាយបង្គំ ជាថ្ងៃសីលរបស់យើង កុំឲ្យយើងបាត់បង់។ ដោយសារអត់ដឹងមានគំនិតបើកសាលា សាសនាវិញនៅពេលណា? ប្រហែលយូរខែទៀត និងយើងយូរខែទៀតខ្លាចគ្រីស្តបរិស័ទបីដូចជាស្វិត រីងដូចសព្វថ្ងៃដូចបឹងស្ទឹងចាប់ផ្តើមរីងនៅកំពង់ធំ។ ខ្ញុំខ្លាចគ្រីស្តបរិស័ទរបស់ខ្ញុំ ជីវិតខាងផ្លូវវិញ្ញាណវាស្វិតទៅៗ និងអស់រលីងហើយ ដោយសារតាមអ៊ីធឺណេតវាអត់សូវស្រួលទេ។ ដូច្នេះប្រសិនបើខ្ញុំអាចរៀបចំជាក្រុមតូចៗ មិននិយាយអីជាផ្លូវការមហាកំពូល ប៉ុន្តែគ្រាន់តែនិយាយខ្លះៗជាព្រះសហគមន៍អាចទៅមុខកុំឲ្យដាច់ៗអុកស៊ីសែន។ ឯកឧត្តមយល់យ៉ាងណាដែរ?»។
ជាការឆ្លើយតម ឯកឧត្តម ឈិត សុខុន បានបញ្ជាក់ថា «សុខាភិបាលគេប្រាប់ថា កុំឲ្យយើងជួបជុំគ្នាក្នុងបុណ្យធំ ហើយរក្សាគម្លាត។ ពេលជួបជុំ គឺក្រុមធំមានគ្នាច្រើន មិនអាចរក្សាគម្លាតបានទេ ១ម៉ែត្រកន្លះទៅ ២ ម៉ែត្រទេ ទោះបីសាលធំម៉េចក៏ដោយ។ បើធ្វើខុសពីហ្នឹង បើមានបញ្ហា នោះមិនបានទេ វាមិនស្វិតទេគឺស្លាប់តែម្តង។ បើគ្រាន់តែស្វិត ស្រោចទឹកឡើងវិញ គឺលាស់ឡើងវិញស្រស់។ តែបើស្លាប់មិនលាស់ទេ»។
រួមជាមួយគ្នានេះដែរ លោករដ្ឋមមន្ត្រីក៏បានលើកឡើងអំពីរដ្ឋធម្មនុញ្ញ ជាច្បាប់កំពូលរបស់កម្ពុជា ដែលអនុញ្ញាតឲ្យប្រជាពលរដ្ឋទាំងអស់មានសិទ្ធិជឿលើសាសនាអ្វីក៏បាន ហើយក៏បានរំលឹកអំពីការរក្សាសុខដុមនីកម្មសាសនានិងសាសនា ដែលជាទិសដៅរបស់រដ្ឋាភិបាលក្នុងយុទ្ធសាស្ត្រចតុកោណផងដែរ ដើម្បីឲ្យប្រទេសជាតិមានសុខសន្តិភាព។ លោករដ្ឋមន្ត្រី «សាសនាទាំងអស់ ត្រូវរស់នៅដោយសុខដុមនីយកម្ម មានន័យថាមានទាំងអស់គ្នា ហើយឲ្យសុខសប្បាយ កុំឲ្យមានទុក្ខ កុំឲ្យមានភ័យ មានរឿង»។
លោករដ្ឋមន្ត្រីមានប្រសាសន៍ទៀតថា «សូមថ្លែង អំណរគុណណាស់ចំពោះប្រតិភូព្រះសហគមន៍កាតូលិក ដឹកនាំដោយលោកអភិបាលអូលីវិយេដែលអញ្ជើញមក ក្រសួងធម្មការនិងសាសនានេះ! សំខាន់ជួយដល់ ប្រជាពលរដ្ឋទាំងអស់ ដែលកំពុងរង់ផលប៉ះពាល់ដោយសារជំងឺ កូវីដ១៩នេះ។ អំណោយរបស់លោកនៅពេលនេះគឺមានសារៈសំខាន់ណាស់ សម្រាប់អាយុជីវិត របស់ប្រជាពលរដ្ឋ។យើងខ្ញុំនឹងខិតខំ យកអំណោយទំាងនេះទៅចែកចាយដល់បងប្អូន»។
ក្នុងដំណើរជួបសំណេះសំណាលនេះ ព្រះសហគមន៍ដែលមានអង្គការការីតាសកម្ពុជាក៏បានជូនសម្ភារ អនាម័យដល់ក្រសួងធម្មការ និងសាសនា មានផ្ទាំងផ្សព្វផ្សាយប្រឆាំងកូវីដចំនួន ៦០០សន្លឹក ម៉ាស់ ការពារ២០០ប្រអប់ សាប៊ូ ២០០០ដុំ និងទឹកអាល់កុលចំនួន ២០០លីត។ ជាមួយគ្នានេះដែរ លោកអភិបាលក្នុងនាមព្រះសហគមន៍កាតូលិក បានចូលរួមវិភាគទាននូវថវិកាចំនួន១០០០ដុល្លាផងដែរ៕
