«អគ្គសញ្ញាលាបថ្ងាសថ្ងៃនេះ ខ្ញុំយល់ថាបានទទួលនូវជីវិតថ្មីបន្ថែមលើអគ្គសញ្ញាជ្រមុជទឹក។» នេះជាការលើកឡើងរបស់យុវជន ម៉ៅ គឹមសេង បេក្ខជនម្នាក់ក្នុងចំណោមបេក្ខជនអគ្គសញ្ញាលាបថ្ងាស១៩នាក់។
ក្នុងសម្លៀកបំពាក់ចងក្បិននិងពានាកន្សែងក្រហមច្រាល ជារបៀបប្រពៃណីខ្មែរ គឹមសេងបន្តថា អគ្គសញ្ញានេះ ធ្វើឱ្យជីវិតជាគ្រីស្តបរិស័ទរបស់គាត់ពេញលេញ ហើយផ្ដល់កម្លាំងឱ្យគាត់អាចក្លាយជាគ្រីស្តបរិស័ទ មានភាពជឿជាក់ និងកាន់តែជិតស្និទ្ធនឹងព្រះជាម្ចាស់ ដោយទទួលបានព្រះវិញ្ញាណដ៏វិសុទ្ធ។
គឹមសេងនិងបេក្ខជន១៨នាក់ផ្សេងទៀត បានទទួលអគ្គសញ្ញាលាបថ្ងាស នាព្រឹកថ្ងៃទី៥ ខែមិថុនានេះ នៅព្រះវិហារសន្តយ៉ូសែបផ្សារតូច នារាជធានីភ្នំពេញ ក្រោមអធិបតីភាពលោកអភិបាលព្រះសហគមន៍កាតូលិកភូមិភាគភ្នំពេញ អូលីវីយ៉េ ជ្មីតហស្លេ និងមានគ្រីស្តបរិស័ទចូលរួមជាច្រើនកុះករ។
បេក្ខជនគឹមសេងបញ្ជាក់ថា ព្រះវិញ្ញាណដ៏វិសុទ្ធបានផ្ដល់កម្លាំង ភាពក្លាហាន ប្រាជ្ញាឈ្លាសវៃ ការកោតខ្លាចព្រះជាម្ចាស់កាន់តែខ្លាំងឡើងថែមទៀត។ លោកបញ្ជាក់ថា «ខ្ញុំនឹងបន្តប្រកាសដំណឹងល្អតាមរយៈស្ថានភាព តាមរយៈពាក្យសម្ដី តាមរយៈអំពើល្អ ដែលព្រះជាម្ចាស់បានបង្ហាញមកដល់ខ្ញុំ។ ខ្ញុំនឹងបង្ហាញសេចក្ដីស្រឡាញ់របស់ខ្ញុំដល់អ្នកដទៃដូចគ្នា។»
នៅក្នុងពិធីនេះដែរ លោកអភិបាលអូលីវីយ៉េ មានប្រសាន៍ថា ថ្ងៃនេះជាពេលវេលាដែលយើងទន្ទឹងរង់ចាំព្រះយេស៊ូប្រទានព្រះវិញ្ញាណដ៏វិសុទ្ធឱ្យយើង ដើម្បីចេញទៅប្រកាសដំណឹងល្អ ដោយរស់នៅបង្ហាញវត្តមានរបស់ព្រះជាម្ចាស់។
មានប្រសាសន៍រំលឹកដល់បេក្ខជនទទួលអគ្គសញ្ញាលាបថ្ងាសនៅក្នុងថ្ងៃនេះ គង្វាលព្រះសហគមន៍ណែនាំថា « ថ្ងៃនេះបងប្អូនទាំង១៩នាក់ជាសញ្ញាសំគាល់មួយពិសេស ដើម្បីឲ្យយើងយល់ថា នៅពេលដែលយើងសុខចិត្តធ្វើដំណើរតាមព្រះយេស៊ូ យើងលេងនៅឯកោ។ ដូចព្រះយេស៊ូមានព្រះបន្ទូលសន្យា ខ្ញុំនឹងផ្ញើព្រះវិញ្ញាណដ៏វិសុទ្ធដែលជាព្រះអង្គដែលជួយការពារនិង បង្រៀន ដឹកដៃអ្នករាល់គ្នានឹងរំលឹកអ្វីដែលខ្ញុំបានប្រាប់ឲ្យអ្នករាល់គ្នាផង។»
ក្នុងនោះដែរលោកអភិបាលបានរំលឹកអំពីដំណើររបស់ព្រះវិញ្ញាណដ៏វិសុទ្ធដែលរួមជាមួយគ្រីស្តបរិស័ទក្នុងពេលដែលរងទុក្ខលំបាកក្នុងសម័យប្រល័យពូជសាសន៍ប៉ុលពត និងជំងឺរាតត្បាតកន្លងមកថា ទោះនៅក្នុងកាលៈទេសៈបែបណាក៏ដោយ ទាំងពេលមានសេរីភាព ទាំងពេលមានភាពតឹងតែង «ព្រះវិញ្ញាណដ៏វិសុទ្ធយាងមក ធ្វើឱ្យយើងទៅជាបុត្រធីតារបស់ព្រះជាម្ចាស់ លែងភ័យខ្លាច ដើម្បីកសាងសន្តិភាពក្នុងដួងចិត្តរបស់យើង ដើម្បីរស់នៅក្នុងសេចក្ដីសុខសាន្ត។»
លោកអភិបាលបន្តថា ព្រះវិញ្ញាណយាងមកដើម្បីរំដោះយើងឱ្យរួចពីបាប ដោយរំដោះយើងពីការឈឺចាប់ និង រស់នៅក្នុងជីវិតនិងព្រះជន្មរបស់ព្រះជាម្ចាស់ផ្ទាល់។
លោក រំឭកទៀតថា ទោះគ្រីស្តបរិស័ទបាត់បង់សេរីភាព ក្នុងសម័យខ្មែរក្រហមពិតមែន ក៏ប៉ុន្តែសក្ខីភាពរបស់ពួកគាត់បង្ហាញថា ពួកគាត់នៅទុកពេលវេលាមួយពិសេស ដើម្បីអធិដ្ឋាននៅក្នុងដួងចិត្តផ្ទាល់ខ្លួន។
ជីវិតរបស់យើងពោរពេញដោយកម្លាំងថ្មី ពោរពេញដោយសេរីភាពយ៉ាងប្លែកៗតាមរយៈអំណោយទានទាំង៧របស់ព្រះវិញ្ញាណដ៏វិសុទ្ធ ដែលនាំឲ្យយើងរស់នៅក្នុងរបៀបថ្មីនៅក្នុងធម៌មេត្តាករុណា ក្នុងការអធិដ្ឋាន និងនៅក្នុងការបម្រើ ដែលនេះជាផលផ្លែ នាំឱ្យយើងឈ្នះឧបសគ្គទាំងអស់។ លោកអភិបាលអូលីវីយ៉េ សង្កត់ធ្ងន់ដូច្នេះ។
ក្នុងធម្មទេសនានាឱកាសនោះ លោកអភិបាលភូមិភាគភ្នំពេញបានរំលឹកអំពីការរួមដំណើរជាមួយគ្នារបស់គ្រីស្តបរិស័ទក្នុងសន្និបាត២០២១-២០២៣ ដែលកន្លងទៅនេះ ភូមិភាគភ្នំពេញបានសរុបចម្លើយខ្លះផ្ញើទៅទីក្រុងរ៉ូម ដែលក្នុងនោះមាន៦ចំណុចសំខាន់ៗរួមមាន៖
១.ធ្វើដំណើររួមគ្នានៅក្នុងព្រះសហគមន៍ដោយទុកឱ្យព្រះវិញ្ញាណដ៏វិសុទ្ធរីកចម្រើននៅក្នុងខ្លួនរបស់យើង ដោយយើងខិតខំកែប្រែចិត្តគំនិត
២. ធ្វើធម៌មេត្តាករុណាចេញជាសកម្មភាពជាក់ស្តែងគ្រប់ពេលវេលានៅក្នុងជីវិតរបស់យើង
៣.ឱ្យយើងចេះសហការគ្នា នៅក្នុងព្រះសហគមន៍
៤.ធ្វើដំណើររួមជាមួយគ្នាដោយរកឃើញរបៀបថ្មីក្នុងការប្រកាសដំណឹងល្អ កុំឱ្យយើងភ័យខ្លាច
៥. ឱ្យយើងទៅជាសាសនាទូតនៃសុខសន្តិភាព
៦. វិញ្ញាណដ៏រិសុទ្ធណែនាំយើងឲ្យយើងធ្វើដំណើររួមជាមួយគ្នា នៅក្នុងព្រះសហគមន៍នៅជាមួយ ព្រះនាងម៉ារី ដែលជាមាតាព្រះសហគមន៍ និងជាមាតាយើង។
លោកអភិបាលបានបញ្ជាក់ថា ព្រះវិញ្ញាណដ៏វិសុទ្ធបានណែនាំព្រះសហគមន៍ជាង២០០០ឆ្នាំមកហើយគឺឲ្យយើងរកឃើញផ្លូវថ្មីជានិច្ច នាំឱ្យយើងទទួលក្រុមគ្រីស្តទូតពីដើម ឱ្យយើងទៅជាបុត្រធីតារបស់ព្រះជាម្ចាស់។
ក្នុងអគ្គសញ្ញាលាបថ្ងាសនេះ លោកអភិបាលអូលីវីយ៉េ ទ្រាបដៃទៅលើបេក្ខជនទាំងអស់ ដើម្បីសូមព្រះវិញ្ញាណមកតាំងលំនៅក្នុងបេក្ខជន និងឲ្យពួកគេទទួលបានផលផ្លែនៃព្រះវិញ្ញាណដវិសុទ្ធ។ បន្ទាប់មក លោកអភិបាលបានយកប្រេងគ្រីស្មាមកដៅជាសញ្ញាឈើឆ្កាង លើថ្ងាសបេក្ខជនដោយប្រកាសថា «ខ្ញុំសុំដៅ (ឈ្មោះបេក្ខជន) ដោយព្រះវិញ្ញាណដែលជាព្រះអំណោយទានរបស់ព្រះជាម្ចាស់» ដែលជាសញ្ញាសម្គាល់នៃការទទួលព្រះវិញ្ញាណដ៏វិសុទ្ធ។
ក្នុងថ្ងៃបុណ្យព្រះវិញ្ញាណយាងមកនេះ ព្រះសហគមន៍ក៏បានរៀបចំធម៌អង្វរសាកលគ្រប់ភាសា ដូចក្រុមគ្រីស្តទូតពីដើមចេញទៅនិយាយគ្រប់ភាសា បន្ទាប់ពីទទួលព្រះវិញ្ញាណដ៏វិសុទ្ធ៕
ដោយដាលីស
