គ្រូអប់រំជំនឿ៤៧នាក់មកពីមណ្ឌលសកម្មភាពចំនួន៣ ឈ្វេងយល់អំពីគរុកោសល្យក្នុងការបញ្ជូនបន្តជំនឿ និងប្រវត្តិព្រះសហគមន៍កាតូលិកកម្ពុជានិងជាសកល ដែលរៀបចំដោយការិយាល័យអប់រំជំនឿភូមិភាគភ្នំពេញ ក្រោមអធិបតីភាពលោកអភិបាលព្រះសហគមន៍កាតូលិកភូមិភាគភ្នំពេញ អូលីវីយ៉េ ជ្មីតហស្លេ។
លោកដួង សាវង់ គណៈកម្មការអប់រំជំនឿភូមិភាគភ្នំពេញមានប្រសាសន៍ថា សិក្ខាសាលានេះ ជួយលើកទឹកចិត្តដល់គ្រូអប់រំជំនឿទាំងអស់ មានកំលាំងដែលនាំឱ្យអាចបង្កើតព្រះសហគមន៍តៗទៅមុខទៀតបាន។
សិក្ខាសាលាគ្រូអប់រំជំនឿនេះ មាន៣មណ្ឌលសកម្មភាពព្រះសហគមន៍ គឺតាកែវ កំពត កំពង់សោម ធ្វើឡើងនៅព្រះវិហារសន្តីម៉ារីញញឹមចំការទៀង ក្នុងស្រុកត្រាំកក់ ខេត្តតាកែវ នាថ្ងៃទី១៧និង១៨ កញ្ញា ២០២២។
លោកអភិបាលអូលីវីយ៉េ ជ្មីតហស្លេ មានប្រសាសន៍ថា «គ្រូអប់រំជំនឿព្រះជាម្ចាស់តែងតាំងក្នុងព្រះវិញ្ញាណដ៏វិសុទ្ធ» ដូច្នេះ គ្រូអប់រំជំនឿ ត្រូវមានជំនឿនិងគរុកោសល្យច្បាស់លាស់ ដើម្បីណែនាំអ្នកមកទទួលការអប់រំជំនឿ។
លោកអភិបាលអូលីវីយ៉េ បន្តថា យើងជាគ្រូអប់រំជំនឿ ជាទូតរបស់ព្រះគ្រីស្ត ជាសាក្សីនៃបទពិសោធអំពីជំនឿ ត្រូវធ្វើយ៉ាងណាឱ្យបងប្អូនដែលធ្វើដំណើរជាមួយយើងស្គាល់ព្រះយេស៊ូ។ ជាគ្រូអប់រំជំនឿ គឺបង្រៀនសេចក្ដីពិត ដូច្នេះយើងចូលក្នុងការអប់រំក្នុងផ្លូវជីវិត ដោយមានជំនឿ និងការអប់រំយកចិត្តទុកដាក់លើកិច្ចការមេត្តាករុណា។
ព្រះសហគមន៍ជាស្ថាប័នចាស់ជាងគេក្នុងពិភពលោក ព្រោះជាព្រះសហគមន៍របស់ព្រះជាម្ចាស់ និងជាគ្រួសារ ដើរជាមួយគ្នាដោយណែនាំបងប្អូនឱ្យមានជីវិតអស់កល្បជានិច្ចតាមរយៈជំនឿ។ នេះជាការបញ្ជាក់របស់លោកអភិបាលអូលីវីយ៉េ។
នៅក្នុងសិក្ខាសាលានេះ លោកអភិបាលបានរំលឹកអំពីប្រវត្តិសាស្ត្ររបស់ព្រះសហគមន៍សកល និងប្រទេសកម្ពុជាដែរ ដែលមានទាំងប្រពៃណី វប្បធម៌ និងជំនឿរួមជាមួយគ្នា។ ហើយព្រះសហគមន៍បានប្រើប្រាស់តួនាទីរបស់ខ្លួន ចូលទៅក្នុងសង្គម ដោយធ្វើកិច្ចការមេត្តាករុណាជាច្រើន។ ក្នុងនោះដែរ ព្រះសហគមន៍ក៏មានមុខងារនិងតួនាទីច្បាស់លាស់ក្នុងរចនាសម្ព័ន្ធរបស់ខ្លួន ពីថ្នាក់សកលដល់ថ្នាក់ជាតិនៃប្រទេសនីមួយៗផងដែរ។
ព្រះសហគមន៍កាតូលិកមានកំណើតនៅក្នុងប្រទេសកម្ពុជាក្នុងឆ្នាំ១៥៥៥ តាមរយៈបព្វជិតជាតិប៉ទុយហ្គាលម្នាក់ ឈ្មោះ ហ្គាស្ប៉ាដាគ្រុស ហើយក៏មានលំហូរនៃគ្រីស្តបរិស័ទពីប្រទេសនានា ដូចជា ឥណ្ឌូនេស៊ី ជប៉ុន វៀតណាមជាដើម។ ប៉ុន្តែជាអកុសល ក្នុងរបបប្រល័យពូជសាសន៍ប៉ុលពត ព្រះសហគមន៍បានបាត់បង់អ្វីៗស្ទើរតែទាំងស្រុងរួមជាមួយប្រទេសកម្ពុជា។
រហូតមកដល់បច្ចុប្បន្ន មនុស្សពេញវ័យភាគច្រើនដែលជាគ្រីស្តបរិស័ទ គឺបានផ្លាស់ប្តូរជំនឿ ដែលមានជារៀងរាល់ឆ្នាំប្រមាណជាង២០០នាក់។
មាឃ ស៊ន ជាគ្រូអប់រំជំនឿ មកពីព្រះសហគមន៍ចំការទៀងនៃមណ្ឌលសកម្មភាពតាកែវ បានយល់ឃើញថា «អប់រំជំនឿ គឺអប់រំឱ្យគេ(អ្នកទទួលអប់រំជំនឿ)ជឿមិនមែនដើម្បីឱ្យចេះទេ»។
ក្នុងសិក្ខាសាលានេះ លោកបានឈ្វេងយល់អំពីចំណុចវិជ្ជមានពីព្រះសហគមន៍ផ្សេងៗ ដែលបានធ្វើជោគជ័យក្នុងការអប់រំជំនឿ ដែលអាចឲ្យលោកយកទៅអនុវត្តនៅព្រះសហគមន៍របស់លោកបាន។
ក្នុងថ្ងៃបញ្ជប់របស់អង្គសិក្ខាសាលា សិក្ខាកាមទាំងអស់បានប្រកាសពាក្យសន្យារបស់ខ្លួន នៅចំពោះមុខលោកអភិបាល ថានឹងប្រកាសជំនឿព្រះសហគមន៍កាតូលិក ដោយធ្វើជាគ្រូអប់រំជំនឿ។
លោកអភិបាលអូលីវីយ៉េ អធិដ្ឋានសូមព្រះវិញ្ញាណដ៏វិសុទ្ធ បំភ្លឺគ្រូអប់រំជំនឿឱ្យស្គាល់សេចក្ដីពិត ទៅជាសាក្ខីភាពនៃជំនឿនិងមានភាពក្លាហានក្នុងការប្រកាសជំនឿ ដោយមានព្រះជាម្ចាស់ជាផ្លូវ ជាសេចក្ដីពិត និងជាជីវិត និងបាចទឹកព្រះពរដល់គ្រូអប់រំជំនឿទាំងអស់៕
ដោយដាលីស
