រាជធានីភ្នំពេញ៖ នៅថ្ងៃទី២៧ ខែមិថុនា ឆ្នាំ២០២៦ ព្រះសហគមន៍កាតូលិកស្វាយប៉ាក (គីឡូលេខ១១ រាជធានីភ្នំពេញ) បានប្រារព្ធពិធីបុណ្យ និងប្រទានពរព្រះវិហារថ្មីរបស់ខ្លួនយ៉ាងអធិកអធម ដែលមានឈ្មោះថា «ព្រះវិហារសន្តីម៉ារីម៉ាដាឡា» ក្រោមអធិបតីភាពរបស់លោកអភិបាល អូលីវីយ៉េជ្មីតហស្លេ ព្រមទាំងវត្តមានដ៏ខ្ពង់ខ្ពស់របស់លោកអភិបាល សិលាសួន ហង្សលី និងលោកបូជាចារ្យជាច្រើនអង្គ។ ព្រឹត្តិការណ៍នេះគឺជាសញ្ញាសម្គាល់ដ៏សំខាន់មួយនៃជីវិត និងការរីកចម្រើនរបស់ព្រះសហគមន៍កាតូលិកនៅក្នុងតំបន់នេះ។
នៅក្នុងពិធីនេះ លោកអភិបាល អូលីវីយ៉េ បានរំលឹកអំពីប្រវត្តិ និងការធ្វើដំណើររបស់ព្រះសហគមន៍ ដោយភ្ជាប់ជាមួយនឹងបទពិសោធន៍ផ្ទាល់របស់លោក។ លោកបានបញ្ជាក់ថា រយៈពេល ២៨ ឆ្នាំដែលរូបលោកទទួលអគ្គសញ្ញាតែងតាំងជាបូជាចារ្យ គឺស្របពេលគ្នានឹងការឈានជើងមកដល់ប្រទេសកម្ពុជាជាលើកដំបូងនៅក្នុងឆ្នាំ១៩៩៨។
លោកបានរំលឹកពីទិដ្ឋភាពចាស់ៗនៅតំបន់ស្វាយប៉ាក ការវិវឌ្ឍរបស់ព្រះសហគមន៍ និងបានសម្តែងការនឹករលឹកដល់គ្រីស្តបរិស័ទចាស់ទុំជាច្រើន ដែលបានរួមចំណែកកសាងព្រះសហគមន៍តាំងពីដើមរៀងមក។ ការសម្ពោធព្រះវិហារនៅស្វាយប៉ាកថ្ងៃនេះ គឺជាសមិទ្ធផលដ៏ធំទីពីរ បន្ទាប់ពីការកសាងព្រះវិហារមួយទៀតនៅតំបន់សែនសុខ របស់លោកបូជាចារ្យ អូគូស្ទីន យ៉ុងហ៊ីអុក វ៉ុន ជាសាសនទូតកូរ៉េ។
ក្នុងធម្មទេសនា លោកអភិបាលបានលើកអំពីប្រវត្តិរបស់សន្តីម៉ារីម៉ាដាឡា (St. Mary Magdalene) ដែលជាឧបការីនីនៃព្រះវិហារនេះ ដោយលោកបានគូសបញ្ជាក់នូវចំណុចសំខាន់ៗដូចជា៖
- គ្រីស្តទូតនៃក្រុមគ្រីស្តទូតទាំងឡាយ៖ ដោយផ្អែកតាមប្រសាសន៍របស់សន្តថូម៉ាស អាគីណាស់ លោកអភិបាលបានលើកឡើងថា សន្តីម៉ារីម៉ាដាឡា គឺជាសាវ័កដំបូងគេបង្អស់ដែលបានឃើញព្រះយេស៊ូមានព្រះជន្មរស់ឡើងវិញ ហើយបានយកដំណឹងល្អនេះទៅប្រកាសប្រាប់ដល់គ្រីស្តទូតដទៃទៀត។
- ការប្រែចិត្ត និងភក្តីភាព៖ សន្តីម៉ារីម៉ាដាឡា ជាគំរូដ៏វិសេសវិសាលនៃការប្រែចិត្តគំនិតទាំងស្រុង បន្ទាប់ពីទទួលបានការលើកលែងទោស និងការព្យាបាលពីព្រះយេស៊ូ។ សន្តីម៉ារីម៉ាដាឡា បានបង្ហាញភក្តីភាព និងសេចក្តីក្លាហានយ៉ាងមុតមាំ ដោយមិនព្រមបោះបង់ ឬរត់ចោលព្រះយេស៊ូឡើយ សូម្បីតែនៅវេលាដែលព្រះអង្គជាប់ឆ្កាង និងសុគត ខណៈដែលសាវ័កផ្សេងៗបានរត់គេចខ្លួនអស់។
- ទំនាក់ទំនងផ្ទាល់ជាមួយព្រះជាម្ចាស់៖ ជំនឿពិតប្រាកដ គឺជាទំនាក់ទំនងផ្ទាល់ជាមួយព្រះជាម្ចាស់។ នៅពេលព្រះយេស៊ូហៅឈ្មោះ «ម៉ារី» នៅឯផ្នូរ នាងអាចចំណាំសំឡេងព្រះអង្គបានភ្លាមៗ ដែលនេះសបញ្ជាក់ពីភាពស្និទ្ធស្នាលខាងផ្លូវវិញ្ញាណ និងសេចក្តីជំនឿដ៏មុតមាំ។
ជាចុងក្រោយ លោកអភិបាល អូលីវីយ៉េ បានរលឹកដល់គ្រីស្តបរិស័ទទាំងអស់ថា កុំឲ្យផ្តោតសំខាន់តែលើអាគារព្រះវិហារដែលទើបនឹងសាងសង់រួច (ទោះបីជាថ្ងៃនេះមានអ្នកចូលរួមច្រើនកុះករ)។ អ្វីដែលសំខាន់បំផុតនោះគឺ គ្រីស្តបរិស័ទម្នាក់ៗត្រូវតែក្លាយជា «ថ្មដែលមានជីវិត» ដែលមានទំនាក់ទំនងផ្ទាល់ជាមួយព្រះជាម្ចាស់។
លោកបានលើកទឹកចិត្តឲ្យបងប្អូនគ្រីស្តបរិស័ទទាំងអស់ បន្តកែប្រែចិត្តគំនិត ដើរតាមគំរូសន្តីម៉ារីម៉ាដាឡា និងបន្តប្រកាសដំណឹងល្អ ចែករំលែកសេចក្តីស្រឡាញ់ដល់អ្នកជុំវិញខ្លួន ក្នុងគ្រប់កាលៈទេសៈនៃជីវិត មិនថាក្នុងពេលសុខស្រួល ឬពេលរងទុក្ខលំបាកឡើយ ដើម្បីជាសាក្សីនៃសេចក្តីពិត៕
