លោកដាមីញ៉ាំង ហ្វានឺ “សន្ត សន្តី ជា Idol សម្រាប់គ្រីស្តបរិស័ទ”
«គ្រីស្តបរិស័ទនីមួយៗត្រូវមាន Idol របស់ខ្លួន ដោយសារជីវិតរបស់សន្តបុគ្គលជួយណែនាំយើងឱ្យស្គាល់ និងឱ្យចួបជាមួយនឹងព្រះយេស៊ូដោយផ្ទាល់» នេះជាសម្តីរបស់លោកបូជាចារ្យដាមីញ៉ាំង ហ្វារនឺ អ្នកទទួលខុសត្រូវព្រះសហគមន៍មណ្ឌលសកម្មភាពភ្នំពេញខាងត្បូង មានប្រសាសន៍ក្នុងថ្ងៃបុណ្យរំលឹកដល់សន្តបុគ្គលទាំងឡាយ នាថ្ងៃទី៣១ តុលា ២០២១ នៅព្រះវិហារព្រះកុមារយេស៊ូបឹងទំពុន ក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ។ លោកបូជាចារ្យដាមីញ៉ាំង មានប្រសាសន៍ថា នៅក្នុងជីវិតរបស់យើងសព្វថ្ងៃមានមនុស្សមួយចំនួនដែលយើងហៅថា Idol ដែលមានឥទ្ធិពលនៅក្នុងជីវិតរបស់យើង ទាក់ទងទៅនឹងសោភណ្ឌ មិនថាមនុស្ស ឬសំណង់អគារនោះទេ។ លោកបន្ថែមថា «ខ្ញុំគិតថាជីវិតរបស់យើងត្រូវតែមានសោភណ្ឌភាព ហើយនេះជាអ្វីដែលព្រះសហគមន៍គោរពគុណធម៌របស់សន្តបុគ្គល ដោយសារសន្តបុគ្គលជាតារាល្បី ជាIdol របស់គ្រីស្តបរិស័ទយើង»។ លោកបូជាចារ្យដាមីញ៉ាំង បានបញ្ជាក់ទៅកាន់គ្រីស្តបរិស័ទទាំងអស់ ឱ្យចេះសម្លឹងមើលសោភណ្ឌភាពដែលជារបៀបរស់នៅនៃសន្តបុគ្គលដែលជាគំរូរបស់យើង ជាពិសេសគឺសម្លឹងមើលព្រះយេស៊ូដែលជាមហាសន្តបុគ្គលទាំងឡាយ។ តាមប្រពៃណីព្រះសហគមន៍កាតូលិក ជនដែលត្រូវបានប្រកាសតែងតាំងជាសន្តបុគ្គលត្រូវមានលក្ខណៈពិសេសដោយឆ្លងកាត់៣ដំណាក់កាលគឺ៖ ១) ត្រូវស្រាវជ្រាវអំពីជីវិតរបស់គាត់ ដែលបានរស់នៅស្របតាមព្រះបន្ទូលដំណឹងល្អ ក៏ដូចជាអំពីកេរ្ដ៍ឈ្មោះរបស់គាត់ ហើយត្រូវបានលោកអភិបាលតាមភូមិភាគ ប្រកាសថាជាអ្នកបម្រើរបស់ព្រះជាម្ចាស់។ ២) ព្រះសហគមន៍ត្រូវប្រកាសអំពីការអស្ចារ្យមួយដែលបានកើតឡើង ដោយវិទ្យាសាស្ត្រមិនចេះពន្យល់ ហើយព្រះសហគមន៍ប្រកាសថាអ្នកមានសុភមង្គល។ ៣) ត្រូវបានសម្ដេចប៉ាបប្រកាសជាសាធារណៈក្នុងនាមព្រះសហគមន៍ទាំងមូលបប្រកាសថាព្រះជាម្ចាសសព្វព្រះហឫទ័យនឹងបញ្ចូលឈ្មោះគាត់ក្នុងបញ្ជីធម៌អង្វរសន្តបុគ្គល។ លោកបូជាចារ្យដាមីញ៉ាំង ក៏បានប្រកាសស្នើដល់គ្រីស្តបរិស័ទទាំងអស់ បន្តការអធិដ្ឋានដល់ដំណើរការមរណសាក្សីនៅប្រទេសកម្ពុជាផងដែរ៕ ដោយ៖ ដាលីស
