លោកអភិបាលលើកទឹកចិត្តដល់មាតាបិតាកុមារអូទីសឹមកុំអស់សង្ឃឹម
សំណេះសំណាលមួយនៅសាលាអប់រំពិសេសនៃការលូតលាស់ (GSES) លោកអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ បានលើកទឹកចិត្ត មាតាបិតា និងអាណាព្យាបាលសិស្សដែលកំពុងមានអូទីសឹម ត្រូវបន្តដើរទៅមុខជាមួយក្ដីសុបិន្ត ដោយជឿជាក់ថា កូនៗអាចធ្វើបាន ហើយត្រូវតស៊ូជាមួយពួកគេដើម្បីសម្រេចឲ្យបានក្ដីសុបិន្តក្នុងចិត្ត។ កម្មវិធីសំណេះសំណាលនេះបានធ្វើឡើងនៅព្រះវិហារព្រះកុមារយេស៊ូបឹងទំពុន ក្នុងសង្កាត់បឹងទំពុន ខណ្ឌមានជ័យ នារាជធានីភ្នំពេញ កាលពីថ្ងៃទី២០ ខែធ្នូកន្លងទៅ ហើយក្នុងនោះក៏មានវត្តមានលោកជំទាវ ឃុន រចនា អនុរដ្ឋលេខាធិការក្រសួងអប់រំ យុវជន និងកីឡា អាជ្ញាធរមូលដ្ឋាន និងអាណាព្យាបាលព្រមទាំងសិស្សជាច្រើនរយនាក់ចូលរួម។ លោកអភិបាល អូលីវីយ៉េបានឲ្យដឹងទៀតថា សាលានេះមានសិស្សច្រើនដោយសារសាលារបស់យើងមានគុណភាព មានសេវាកម្មដ៏ល្អប្រសើរដើម្បីជួយឱ្យកូនៗរីកចម្រើន។ សាលាGSES ជាសាលាមួយរបស់ព្រះសហគមន៍កាតូលិក ដែលទទួលអប់រំនិងថែទាំកុមារមានអូទីសឹម។ បច្ចុប្បន្ននេះ មានសិស្សចំនួន៣០០នាក់ កំពុងសិក្សានិងមាន៥នាក់ផ្សេងទៀតស្ថិតក្នុងបញ្ជីរង់ចាំ។ លោកអភិបាលបន្តថា សាលាយើងនិងឪពុកម្តាយមានសុបិនរួមគ្នា គឺចង់ឱ្យកូនៗមានទំនាក់ទំនងនៅក្នុងសង្គម មានសកម្មភាពជាមួយជីវិតរស់នៅប្រចាំថ្ងៃ ដូច្នេះយើងត្រូវជួយគ្នា ដើម្បីឱ្យកូនៗរបស់យើងរីកចម្រើនតាមសមត្ថភាពបន្តិចម្ដងៗ ដោយជឿថានៅក្នុងគ្រួសាររបស់យើងនឹងមានសេចក្ដីសុខសាន្តពេលដែលឃើញកូនៗរីកចម្រើន។ បើតាមប្រសាសន៍របស់អ្នកស្រី ភោគ ម៉ានី នាយិការសាលាអប់រំពិសេស បានឱ្យដឹងថា កិច្ចសំណេះសំណាលនេះ នឹងជួយលើកទឹកចិត្តដល់ឪពុកម្តាយកុមារ បន្តជួយកូនរបស់គាត់ និងបន្តរស់នៅជាមួយនឹងក្ដីសង្ឃឹម។ អ្នកស្រីសង្កត់ធ្ងន់ថា អ្វីសំខាន់គឺពាក្យស៊ូៗដែលយើងត្រូវទៅមុខជាមួយគ្នា។